Klaro kaayo nga way tarong katulog si Nisa (tinuod ngalan gitago) kay gawas nga way himol, nagluya unya nanglagom pa gyod iyang mata nga murag kinulata.
Matag karon ug unya, makasuway ta og bation og kahapoy sa lawas kon makuwanangan sa oras ang tulog, labi na og na stress, dunay bug-at nga problema nga gisagubang, na depressed o mitukar ang bipolar nga disorder o dunay isyo sa kakuwang sa atensiyon.
Gawas ini, dunay mga pagkaon ug gimbuhaton nga makasamot og pasiga sa mata sama ining mosunod:
Daghang gikaon maong sarang busoga bisag hapit na matulog labi na tong mahilig mag midnight snack. Sa gihihimong pagtuon, ang pagkaon og mga tam-is ug pagkaong daghan og calories makapasamot pagsiga sa mata. Ang nakaapan kay ang uban magsakit ang tiyan kay di pa kahilisan.
Tambag sa mga mananambal, likayi ang pagkaon og daghan duha ngadto sa tulo ka oras una matulog. Kon di malikayan, gamay lang kun bite size ang kusam-kusamon aron di maglisod og tulog. Gani duna nay daghang nahitabo nga nangamatay kay giurom kay lagi natulog nga busog.
Sunod king pag-inom og mga soda sama sa softdrinks o kape o tea nga dunay caffeine. Ang pag inom unya duol na sa tingkatulog maka pasamot og siga sa mata. Kon ugaling di gayod kalikayan, pilia ang kadtong kape o tsa nga decaffeinated unya imna kini lima ka oras sa di pa matulog.
Likayi sab ang pagtan-aw sa telebisyon o sa imong mga gadgets (cellphone, ipad, etc,) kay ang kahayag ini maka alisto hinuon sa atong mata ug huna-huna. Hinuon, pagnga ang tanang mga suga aron ang imong mata hinayhinay sab nga makapiyong unya mahinanok.