Dunay higayon nga makahibulong kon nganong ang imong pares, mauyab, bana o asawa, hinayhinay nga nabugnaw ang pagtratar unya nagpalayo.
Para nako mas maayo analisahon ug sabton ang mga rason aron mapakgang ang panagbuwag ug mapangitaan og paagi nga mabalik ang kainit sa pagbati sa matag-usa.
Matod ni Crystal Dunkers, usa ka licensed counselor sa Estados Unidos, kining mosunod maoy kumon nga mga ehemplo, basi sa iyang gihimong pagtuon, kon nganong ang pares magpalayo:
Pinaka una kining pagkasinati og stress unya ang posibling stressor iyang trabaho, pamilya o pagtuon.
Mosamot kini kon magkaanam og katipun-og iyang mga isyo unya magsagol na iyang gipang huna-huna ug gipangbati. Posibli nga ang iyang oras didto giyabo sa iyang pagkumbati sa stress ug sa stressors.
Sunod kining kanunay nga pagpamanghag, pagluodluod o pakauwaw sa iyang pagkatawo, apil mga post sa social media nga daghang makabasa.
Laing rason ang pagbaliwala sa ilang presensiya nga murag wala sila mo exist. Apil ini ang wa paghatag og importansiya.
Mahitabo kini labi na kon ikaw sobra ra ka independenti nga para nimo mabuhi ra ka bisag wa siya. Labi pa ni makapabugnaw kon di nimo tinggan o pansinon bisag naa sa imong atubanagn maong mas baling molakaw o magpalayo na lang kaysa murag nakig-estorya sa hangin.
Unsa may angay buhaton para masalbar pa ang nagkabugnaw nga relasyon?
Open conversation nga dunay intensiyon sa pagpaminaw sa tinuod. Mahimo nimong prangkahan siya sa imong gibati aron siya mahibalo ug makasabot. Ayaw pakitai og pagmahay o kasuko kay basin hinuon mosamot og tak-om.
Kon moingon ang imong pares nga naa siyay kahadlok tungod sa iyang mga unang ka relationship nga nangapakyas, mahimo nimo siyang ipaestorya sa counselor para magiyahan.
Ang relasyon partnership, unya give and take sab. Di sa tanang panahon nga magsegi ra ka og dawat o hatag.
Kon magsegi ka og pagukod o papresyo, moabot ra unya ang panahon nga mapul-an o kapuyan na imong partner unya uwahi na ang tanan.