Sa tumang palugit ug makabuang nga selos ni Zil (tinuod ngalan gitago) tungod sa iyang nakita nga mga post ug hulagway sa social media, mi-atras ug mipalayo na hinuon iyang Amerikanong uyab.
Agig panimalos, nigamit og lain-laing alyas si Zil aron di siya mailhan, unya iyang gibanatan og paka-uwaw ang bag-ong kaplag sa iyang kanhing hinigugma gamit ang social media.
Apan wa mo epekto iyang stratihiya kay wa man siya patuli sa langyaw ug sa bag-ong hinigugma nga edukada. Gisumbong hinuon siya didto sa mga awtoridad ug gi-block iyang account sa social media.
Misamot iyang mahay kay nahibaw-an na lang niya nga gipakaslan sa dayon ang bag-ong hinigugma unya nahimong legal wife sa Kano.
Akong hisgutan karon mahitungod sa mga negatibong epikto sa social media ngadto sa relasyon o kaminyuon kay sayod kita nga daghan nang nanag-away o nagbuwag tungod lang sa ilang nabasa o nakita sa social media.
Pinaka una kining nahitabo ni Zil, ang social media maka-ingon sa tumang selos ug kasuya labi na kung magsugod na og kumparahay.
Lain sab ning Cyber infidelity. Mag flirt- flirt o mag ibog-ibog dayon sekritong mag message hangtod nga matintal, mao ni maka-guba sa intimasiya o pagsalig sa usa’g usa.
Sunod kining pagka-kuwang sa komunikasyon nga maoy makaingon sa di pagsinabtanay ug pagmenus sa emotional intelligence.
Ang uban ma addict sa social media. Di mahimutang kung di maka-abre sa iyang account unya manuyo kung way mo ‘like o mo comment’.
Di na maka face to face og estorya unya tungod kay kanunay naman nga gadget ang kauban, hinay hinay kining mopaingon sa pagka lonely.
Kining social media makapakgang sab sa trabaho labi na og naay magsige og dawat og notification o message.
Angay hinumduman nga i-balansi ang paggamit sa social media ngadto sa pagpalambo sa relasyon.
Ayaw ipadaplin ang inyong inadlaw-adlaw nga personal nga pagkukabildo sa imong pares unya kung dunay isyu, angay husayon gilayon.