Nagka-anam na og ka bugnaw ang huyuhoy sa hangin ug nagsugod na sab og kislap-kislap ang mga series nga suga ug parol kay usa ka buwan na lang Pasko na!
Ang mga manindahay nagsugod na sab og pasundayag sa ilang mga makadani ug maanindot nga mga baligya unya ikaw nga nagtan-aw madani sa pagpalit nga wa sa budget.
Ang akong hisgutan karon mahitungod og mga paagi unsaon pag-shopping nga di tantong makabuslot sa bulsa labi na karong umaabot nga Pasko ug Bag-ong Tuig aron di magpanic-buying, magpalayo sa taas nga linya sa mamalitay, di mahutdan sa mga himalitang baligya ug palayo sa mahal nga presyo sa mga in-demand nga pang regalo.
Ayaw ka dismaya kay duna ka pay 1 ka buwan nga preparasyon sumad karon.
Pinaka-una ang paghimo og deadline sa kaugalingon nga kaya nimong tumanon. Markahi ang petsa nga ikaw mamalit o mag-shopping aron di magkara-kara o mag-panic buying kon duol na ang selebrasyon. Mapalayo sab ka sa nagpunsisok nga mga shopper, disgrasya, aksidenti ug kawat.
Desisyoni daan basi sa imong budget ang kantidad nga imong ipahat para sa imong i-regalo.
Sunod, ilista daan imong hataganan og regalo gikan sa imong manito, exchanging gifts, pinaskuhan sa mga kinugos, linudhan, higala ug kabanay. Mas sayon kon ingon ini nga paagi kay makita nimo kon kinsa na imong napalitan og pila pa imong hataganan.
Para makadaginot og gamay, pwede kang manghatag og imong binuhat o niluto nga gasa sama sa cakes, cookies o pastries. Kaniadto maghimo ko og colorful nga achara butangan nako ang garapa og ribbon nga maoy akong gigasa sa akong gipang gasa. Nindot ang imong binuhat kay naay gamay nga personal touch.
Christmas in July. Akong pasabot nga mag shopping na samtang sayo pa labi na kon dunay sale para makapundo na ka daan unya igo ka na lang magputos inig duol na ang Pasko.
Huna-hunaa nga dili lang regalo imong atimanon ining duha ka espisyal nga selebrasyon. Kinahanglan ka pang mag-andam sa imong mga Christmas decorations ug luto og kinaham nga pagkaon.