Dunay mga tawo nga ganahan nimo bisa’g way rason. Duna say uban nga bisag unsaon pa nimo og tambling, di sab gyod ganahan nimo.
Matod ni life coach Michael Chauya sa iyang artikulo nga ‘Beware of Unfriendly Friends’, daghang higala nga nag-alirong nato nga patalikdon ra ka dayon dusak-dusakon sa buko-buko.
Unsa may mga timailhan sa mga nagpakaaron ingnon o peke’ng higala?
Pinaka una, sa buntag mura kunuhay mo og BFF kay kusog man mo kukabildo, maminaw ug mokatawa kon naa sa imong atubanagan apan inig ka gabii diay ikaw ug ang imong sitwasyon ray gihimong sumsuman sa libak ngadto sa iyang mga kapamilya o kaila. Himoon ka pa nga ehemplo sa bati’ng binuhatan.
Sunod, kini sila maayo ra nimo kon dunay makuha o gikinahanglang tabang. Ang kapait kay kalit ni silang mawagtang kon ikaw na ang nagkinahanglan. Kanunay ang ila rang kaugalingong panginahanglan ang ilang gihuna-huna.
Ang imong kalampusan o naabot ilang ikaguol, ikasuya ug ikahadlok sa hilom. Di ni sila mahimuot kon naa kay madawat nga award o promotion kay para nila kompetensiya ka unya ilang ipasinati nimo nga sila mas labaw ug daghang kahibalo.
Kon makapanaway sab ni sila, wagas. Ilang ibalikbalik paghisgot ang mga negatibong panghitabo o sitwasyon sa imong kaagi para mauwawan ka atubangan sa uban. Para nila wa kay nahimo’ng maayo o nabuhat sa imong kinabuhi.
Di sab ni sila bation og kasubo o pagmahay kon ila kang pasakitan.
Di sab ni sila kabalo mangayo og abiso o pasaylo kon nakalapas kay para nila sila ang pirming insakto.
Kon mahibalo ni sila nga nasakitan ka, magpista hinuon kini sa kalipay. Ang imong kasakit ilang ihudyaka.
Mangalipay sab ni sila kon imong isulti imong mga tinagoang sekreto kay mao man sab ni ilang gamiton para i-blackmail ka o ba kaha pasakitan.
Kon magpadayon ka og paduol ini nila, mura ra sab ka og mi ‘ok’ nga buhaton ni nila nimo. Busa, palayo gilayon. Daghan pa kang makita’ng higala nga tinuoray nga moduyog sa imong kalipay, kasakit ug kasubo.