Magpalain ta og hisgutan karong adlawa.
Akong ipahinungod akong lindog sa mga bana nga tungod sa gidugayon sa panahon nga nag-ipon isip magti-ayon nakalimot na sa balor sa iyang kapikas.
Dunay sikat nga panultihon nga ‘a good woman is hard to find’ unya swerti na unta kaayo kon maka-pares og ingon ini (good woman o wife material) apan ang kaalaot kay wa man kini pakita-i og katumbas nga respito, atensiyon, pagtagad ug paghigugma nga angay kon deserve para niya, labi na og yano-yanuhon ra og yaw-yaw, singhag nga morag naka kasaba og bata, parisan og litok og mga mahait nga mga pulong nga labihang makapasakit sa pagbati.
Kini’ng tanan posibling mopaingon sa kapuol ug dako ang puruhan nga kon mapuno ug mapul-an na, mangita kini og laing kahigayunan nga siya mahatagan og pagtagad, pagmahal, respito ug balor sa iyang pagka-asawa, inahan ug babaye.
Matod ni life coach Robbie Harvey, ang tawag ini nila ‘single wife’ kay bisag nagsul-ob pa sa imong wedding ring, legal inyong kasal, nagpuyo sa usa ka balay pero sa sulod iyang gitago ang nag-umidong pagbati nga siya nag-inusara sa tanang aspito sa inyong kaminyuon.
Para niya roommate o housemate ra mo, o ba kaha imo siya’ng gihimong katabang o dekorasyon sa imong panimalay aron duna kay mapakita nga asawa ug pamilya sa katilingban.
Kon kini mahitabo, di na ko mamahay ang asawa nga moduol sa laing tawo nga di magdumili sa pagpaminaw sa iyang mga kahingawa ug makasabot sa iyang mga hinanaing kay normal man sa usa ka asawa nga, matag karon ug unya, makadawat og pagdayeg ug pasalamat gikan sa iyang pares kay di baya lalim ang papel ug paningkamot sa usa ka asawa ug inahan para di mabungkag ang banay.
Busa ayaw ihikaw ang kinasingkasing nga pagpasalamat, dak-a ang dunggan sa pagpaminaw bisag way tambag nga gipangayo, duyugi siya sa iyang kaguol ug kasakit labi na iyang mga bug-at nga isyo o kaligutgot nga giluom ug lawma ang pagsabot sa gisulti sa iyang kasingkasing.
Ang asawa nanginahanglan og pares, dili kompetinsiya, nga iyang makauban, masaligan ug masandigan.