Usa nako sa di maihap nga naglisod o nagkuwang og oras sa pagkatulog maong karong adlawa akong tukion ang mga rason ngano.
Sa gihimong survey sa taga Sleep Better Institute, 67% sa ilang gipangutana ang gustong mobaylo sa ilang panahon pagbakasyon para lang makatulog og tarong.
Unsa may kasagarang mga sleep killers nga maoy maka-ingon sa padayong pagmata panahon sa katulog?
Pinaka-una ang tumang pag-inum og isog nga kape. Ang Caffeine nga ingredient maoy maka-bara sa aksyon sa pagkatulog. Suwayi hinuon ang kape nga decaf o ba kaha inom ini walo ka oras una ka matulog igo ma wash-out sa imong lawas.
Sleep killer number 2 kining tumang kahayag sa palibot. Ang pagduwa gamit imong gadgets o grabe ka hayag sa suga makapasamot og siga sa mata busa angay kining palungon. Ang ka ngitngit o pagpatay sa suga makapa-ingganyo sa pagkatulog labi na og bugnaw ang palibot.
Ikatulong sleep killer kining ilimnong makahubog (bino o beer). Bisan tuod og bation ka og pagpanglapoy o katulogon apan ang mahitabo minanok ang imong pagkatulog kay magputol-putol naman hinuon. Sa tungang gabii makamata ka dayon maglisod naka og balik maong bation ang panglapoy sa lawas o katulog sunod ugma.
Sunod kining pagbati og kabalaka (worry) labi na kung naay bug-at nga gihuna-huna o problema labi natong na depressed.
Lain sab ning naay gibati nga sakit-sakit sa panglawas sama sa buko-buko, tiyan, tutunlan o ba kaha dughan. Kung naay laing gibati, lisod sab ikatulog kay ma alingasa man.
Sleep killer sab ning katiguwangon. Naka obserba ka ba nga kasagarang pinakasayong mo mata ang mga senior sa panimalay? Sayo ni silang mangatulog apan gamay lang nga kasikas makamata ni sila gilayon.
Sunod kining kusog nga paghagok labi na sa imong katupad matulog o ba kaha dunay Sleep Apnea (ang pag-undang og ginhawa sa makadiyot samtang natulog kay naay nakababag sa airway kasagaran soft tissue sa luyo sa tutunlan nga mi collapse).
Ang mahitabo ini di ka katulog unya magduka ka na nuon sunod ugma.