Di matukib akong kalipay dihang nahimo nakong lola. Samot karon nga 2 anyos na akong apo unya daghan ng ikapakita nga talento ug makapalingaw nga mga pasundayag.
Karond adlawa akong igahin kining lindog sa mga bag-ong nahimong mga ginikanan para sa sayo pa magiyahan na ang pagmatuto sa bata.
Ang mga bata dali kaayo makasunod sa ilang madungog ug makita busa pagbantay ug pagmatngon sa imong mga aksyon ug ipanulti. Kung unsay ilang nakita o nadungog, mao sab kini ilang sundon. Matod pa bitaw sa panultihon, ‘sa mata ng bata ang ginagawa ng matanda ay tama’.
Ayaw ihikaw nila ang imong gakos, sipa nga halok (apil una matulog), og unlimited nga pagliktok sa pulong nga ‘I Love You’.
Ayaw paglaom nga ang tanan makat-unan sa eskwelahan. Kitang mga ginikanan dunay resposibilidad pagtudlo sa atong mga anak sa gimbuhaton sa balay sama sa panglimyo, (bisag sa ilang lawak), ginagmay ug simple nga paglung-ag/luto, pilo sa mga linabhan, apil na ang gardening.
Pasuwaya una sila og sulbad sa ilang problema una ka mosulod o mo boluntaryo og tabang aron makat-on sila og himo og kaugalingong desisyon sa gagmay pa. Ayaw i-spoil pinaagi sa pagsalo o sulbad sa ilang isyu/ problema aron di magsalig.
Pangita-i og panahon nga para ra gyod nila . Ayaw ipiyal tanan sa imong yaya o nagbantay kay basig di na hinuon ni makaila nimo.
Sulod sa ilang batang kalibutan. Apil sa ilang mga duwa-duwa sama sa balay-balay, Barbie, monster trucks, pokemon cards, ug uban pa.Pag-gahin og adlaw para lang gyud nila sama sa pag-adto sa dagat, suroy sa park, hiking o duwa og sports. Ipadaplin o ibilin usa ng cp aron way maka estorbo.
Kung makabuhat og maayo, bisag unsa ka gamay, ayaw ihikaw imong pagdayeg kay makapuno kini sa ilang kompiyansa sa kaugalingon .
Gahini sab og panahon nga ang mga bata maka-bisita sa apohan kay gawas nga makawala kini sa kamingaw, makahatag pa kini og kalipay sa apuhan. Makat-on sab sila pag ila ug pag-respito sa ginikanan sa ilang amahan ug inahan.