Di kalikayan nga bisag unsa pang klase sa trabaho duna gayoy masinati nga stress.
Dunay uban nga grabe ka stressful ang klase sa trabaho sama sa mga emergency nurses, police, traffic enforcers, o abogado. Kini nga mga trabaho dako og risgo kay ang kinabuhi sa uban nagdepende man kon unsaon kini nila pagdala sa inadlaw.
Ang uban di kaayo tantong naghangak sa ka stress apan duna gihapoy mga higayon ma stress labi na kon ting deadline, balik- balik nga gimbuhaton, nagliundok nga papeles o ba kaha nagsige og atubang og kustomer nga nangasuko. Ang uban sab magsige og meeting og inoras nga murag wa nay kahumanan.
Di lang ang mismong trabaho maka stress lakip ang lugar nga gitrabahoan ug ang mga tawo nga katrabaho sa palibot labi na mga amo.
Ang resulta ini labad sa ulo, mopaspas ang pagginhawa, maglisod og katulog, saputon, sakitan og tiyan hangtod nga ang uban ma depress, magkasakit sakit sa buko-buko, kasingkasing o kaunoran. Unya mosamot na hinuon ka daghan ang mahimong sayop sa gitrabaho kay wa na may klarong konsentrasyon.
Dia koy ipa-ambit nga mga suhistiyon aron di malumos sa stress.
Sugdi imong adlaw paghimo og listahan sa imong mga trabahoon, lakip ang mga tawo nga imong tawgan o suwat nga pagahimoon. Mas maayo kon imong unahon paghimo kadtong dali ug sayon ra buhaton aron dali nimong makita imong agi unya madasig sab ka pagbuhat sa sunod nga naa sa imong listahan.
Ayaw kalimot pag break bisag 15 minutos kada duha ka oras. Ilihok imong abaga, liog, ug kamot. Pwede sab nimo suwayan ang ‘power nap’ sa imong break mahapon mga 10-15 minutos para ma refresh ka.
Ayaw sipyata og kaon panahon sa tingkaon aron di mapasmo o magkasakit.
Human sa trabaho, lakaw o pag-ehersisyo para maka hanggap og preskong hangin.
Inig katulog magabi, pag-imagine nga nagrelax-relax ka daplin sa baybayon, asol nga dagat o sa mahangin nga bukid.
Pagplano og bakasyon bisag kadiyot lang kon mahimo, para makapahuway ug presko na sab ang paminaw inig balik.