Normal ra sa magtia-yon ang mag-away labi na sa adjustment period sa kaminyuon kay moguwa na man ang tinuod nga kolor nga wala makita sa uyab pa.
Ang ubang asawa o bana nga masubrahan sa sakit nga mga saway unya dili kaagwanta, mamutos dayon layas.
Atong tukion ang mga pa-agi kon unsaon pagpanaway ni misis o ni mister nga dili kaayo tantong masakitan.
Himumdumi nga dagko namo nag-ila unya lainlain mo og paagi sa pagpadako sa inyong tagsa-tagsa ka ginikanan ug pamilya.
Una, likayi intawon ang pagsiyagit. Hinaya lang gud pagsulti ang imong mga punto, tubag o rason kay dili man na bungol ang imong pares. Pwede kaayo kang manguriksyon apan dili kinahanglang isyagit kay makaulaw kini.
Ayaw sab og panaway atubangan sa mga bata kay makasamot kini sa kauwaw. Mawad-an sab og respito ang bata ngadto sa ilang inahan o amahan nga gisaway o gipakauwawan.
Paninguha nga dili ka manaway atubangan sa publiko o sa ubang tawo kay makaminos kini sa pagtan-aw sa mga tawo diha nimo unya ang imo sang asawa o bana mawad-an og kumpiyansa sa iyang kaugalingon.
Kon manaway man gali, ang tumong ini para mas mopalambo o mag-usab kay imo man siyang palangga dili nga imo siyang husgahan o sawayon. Hinunoa nga wala biya’y tawong perpekto, masayop man gali ang kabaw nga upat ang tiil, kita pa.
Sunod ayaw na buhia pa ang mga isyu nga dugay ng namatay. Move on na unya focus sa bag-ong isyu nga inyong gilantugian.
Ayaw sab atakiha iyang pagkababaye o pagkalalaki o ba kaha ang pagkainahan o amahan sa imong mga anak kay dako kining insulto sa iyang dignidad ug pagkatawo.
Likayi ang pagtandi sa imong pares ngadto sa ubang asawa o bana. Hunahunaa biya nga siya imong gipiling pakaslan kay duna siyay mga hiyas nga imong nagustuhan.
Ayaw hikawi sa pagdayeg imong pares kon naa siyay nahimong insakto o maayo, dili kay puro na lang ka og reklamo kay murag wala na siyay nabuhat nga insakto.
Katapusan, tabangi ug tudlui hinuon imong pares imbes imong sawayon.
Kon gusto ka nga mahimo siyang anghel, himoa usa imong panimalay nga langit.