Binghay: Unsay makapa-abog palayo sa imong mga higala?

Kukabildo
SunStar Binghay
SunStar Binghay

Duna koy kaila nga way higala’ng magdugay kay gawas nga palaaway, ang kinaiya di sab masabot.

Ang ending, nagpunay na lang hinuon siya og lukso-lukso pangita og grupo nga iyang makauban kay nangatras naman ang uban ug way gustong makig-uban.

Sure ko nga ikaw nga nagbasa ining lindog dunay puparehas ini nga klase sa amiga o amigo.

Unsa may mga rason nganong hinay-hinay nga magpalayo ang atong mga higala?

Pinaka-una kining kinaiya nga di kabalo maminaw. Imong gipakyaw ang pag-estorya unya ang imong mga kauban di na halos katingog ug paambit sa ilang huna-huna.

Ang resulta, ang imong kaestorya bation nga di siya importante o wa siyay labot.

Kon naa gali mag-estorya, paminawa una dayon patiwasa sa iyang punto una ka mosulod. Lain sab ning manal-ot sa estorya bisag layo kaayo iyang topic nga gihisgutan. Usa kini ka conversation killer ug bastos nga batasan.

Sunod kining kinaiya nga magsegi og reklamo. Para niya siya ray insakto unya ang uban sayop.

Kada lihok reklamo unya di makontento sa unsa ray naa. Sure ko nga magpalayo ang higala kay mabungog kini sa imong mga way katapusang reklamo.

Wa say ganahan makig-uban sa tsismusa kay mahadlok naman hinuon nga inig talikod sila na say libakon unya hasta ilang mga personal nga sekrito isabwag sab sa uban.

Sunod kining pagpanghilabot sa personal space sa uban kay mawad-an naman hinuon og privacy unya di na sab ma komportabli ang imong higala.

Kini sang kusog mangyaga-yaga ug manginsulto. Magpalayo na lang hinuon ang imong higala kay di man ni sila ganahan mainsultohan ug mauwawan.

Subra ka tabian o estoryador nga ang uban magbula-bola na ang laway sa kilid sa ngabil o manglisik ngadto sa ka-estorya. Hatagi sab intawon ang uban og panahon nga makapaambit sa ilang kasinatian,pulong ug huna-huna.

Sunod ang pagka-hugawan ug katag kay makapaabog palayo ug makapawa sab sa kompiyansa sa uban.

Atong sumpayan sunod Sabado ang uban pang mga rason nganong magpalayo atong mga higala.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph