Tungod sa dakong gugma ug pagsalig ni Rosyl (tinuod ngalan gitago) ngadto sa iyang ikatulong langyaw nga bana, iyang gipakita iyang tanang baraha pagpahibalo sa iyang tinigom , insurance, pension ug mga kabtangan lakip iyang ektaryang mga yuta ug mala mansion nga balay.
Wala siya kadipara nga duna diay dautang tumong iyang bana kay nagsoge og pangutana sa mga papeles, titulo, ATM cards og mga bank books unya gipugos pa gyud siya og pahimo sa iyang Last Will and Testament para gyud masiguro nga ang tanan mapunta sa langyaw kon ugaling mopanaw na siya sa dayon.
Tuod man sa iyang pagkamatay, ang bana maoy nabulahan ug nabuhong sa iyang tanang hinagoan. Ang akong lindog karong adlawa mahitungod sa mga butang nga di angay ipanabi.
Una ang imong mga hinipusan o tinipig nga kantidad, kabtangan, balay o yuta. Kini makahatag hinuon og ideya ug interes sa uban o ba kaha mang-ingganyo sa kawatan.
Di sab maayo ipanabi ang imong mga sakit-sakit o medical history (sakit nga naagian) gawas kon gikinahanlan gayud sama sa imong doktor.
Ayaw sab iladlad ang personal nga mga panghitabo sa imong kinabuhi lakip imong lovelife o relasyon kay siguradong himuon kining pulutan sa mga walay lingaw nga marites.
Di sab angay ipanultli imong mga sayop o maka-uuwaw nga kasinatian kay yaga-yagaan ra ka labi na sa nagdumot nimo.
Ayaw intawon padala sa mga tam-is nga estorya sa hackers nga magpakaaron ingnon nga imong kaila unya mangayo sa imong social media password o account number sa bangko kay siguradong makawat nila imong kuwarta. Gamit sa mga bag-ong teknolohiya nga gitawag og Artificial Intelligence masunod sa robot/hackers ang tingog nga mura sab og tinuod.
Dili sab maayo ipanabi imong mga plano. Matod pa bitaw sa mga katiguwangan dilekado kining masungo. Kon gusto gyud ka, unya na ipanabi o post sa social media kung nahuman na.
Walay aso nga makumkom. Bisag unsa pa mo ka-suod sa imong gi-estoryahan, di ka makaseguro nga iya sab ning itago.