Nakapangutana ka ba sa imong kaugalingon kung maayo ba ang imong pagmatuto sa imong mga anak?
Bisan pa man sa imong pagtuo nga ulirang nanay ka apan kung imong itandi imong dinad-an sa imong mga anak sa ubang mama, di kalikayan nga makapangutana ka sa imong kaugalingon kung insakto ba ang imong pagpadaku sa imong mga anak.
Kasagaran atong masunod kung gi-unsa sab ta pagpadaku sa atong mga ginikanan.
Kining mosunod maoy mga kalapasan nga makadaot sa pagpadaku sa bata: Pinaka-una kining pagpanapat ug panginsulto sa bata. Bisag ka usa ra kini mahitabo, ang epekto ini di dayon mawala unya madala pa sa bata hangtod sa iyang pagdaku. Ang resulta mawad-an ang bata og kompiyansa sa iyang kaugalingon unya mahimong manggi-uwawon.
Sunod kining paghatag og sayop nga ehemplo. Ang bata, bisag di pa tudloan, kusog mo sunod-sunod sa mga dagku sa iyang palibot. Sama sa panultihon nga “sa mata ng bata ang ginagawa ng matanda ay tama’ kung ang iyang nakita nga ehemplo bakakon, libakira, palahubog, tamaran, dunay taas nga posibilidad nga maingon ini sab sila inig ka daku.
Lain sab ni ang pagsige og tandi. Ang pagsige og komparar sa ubang bata bisag paryente o igsoon pa, pananglitan ang pag-ingon tan-awa ra gud ni atong silingan kay buotan, utukan ug kugihan samtang ikaw way klarong ikapakita unya tamaran pa sa kagwang.
Sunod kining kanunay ug balik-balik nga pagpanaway imbis unta suportahan sa iyang mga kalihukan. Ang ka-apan kay naay mga mama nga perfectionista unya ang gusto niya maoy kanunay matuman.
Duna say ubang inahan nga mas importante ang opinyon ug ikasulti sa uban imbis unta palabihon ang pagbati sa bata. Bahala og unsay isulti sa uban ang imporatante nga naa ka sa kiliran sa imong anak nga nagdepensa ug suporta niya.
Katapusan kining authoritarianism. Pasabot nga ang inahan maoy kanunay magbuot sa tanan di gali ka tingog iyang mga anak.
Angay hinumduman natong mga inahan nga lahi-lahi og kina-iya, utok og talento atong mga anak bisag kaluha pa.