GIHUGTAN sa Dakbayan sa Lapu-Lapu ang kampanya batok sa rabies pinaagi sa mandatory nga pagparehistro sa binuhing mga iring ug iro ug hatagan og libreng bakuna tungod sa kalit nga pagsaka sa kaso sa pinaakan sa hayop.
Giaprobahan sa Konseho sa Siyudad ang usa ka ordinansa nga nagkinahanglan sa tanang tag-iya og binuhi sa pagparehistro ug pagpabakuna sa ilang iro ug iring batok sa rabies.
Ang libreng pagparehistro ug tinuig nga serbisyo sa pagpabakuna ihatag sa City Veterinary Office (CVO), samtang ang pagkapakyas sa pagsunod magpahamtang og nagkataas nga silot.
Tumong sa maong lakang nga mapakunhod ang nagkadaghan nga insidente sa pinaakan sa hayop nga niabot og 12,662 ka kaso gikan sa Enero hangtod Mayo 2025, pagsaka nga sobra sa 2,700 ka kaso kon itandi sa parehong panahon sa 2024.
Gibutyag ni Konsehal Emilio Galaroza Jr., tsirman sa committee on drugs and health ngadto sa SunStar Cebu niadtong Lunes, Hunyo 23, 2025, nga ang mga serbisyo sa pagpabakuna ug pagparehistro gitanyag nga libre sa CVO.
Ang tanang residente nga adunay iro ug iring kwalipikado alang sa libreng tinuig nga bakuna ug balido sa tibuok kinabuhi nga pagparehistro.
Tumong sab sa ordinansa nga matabangan ang siyudad nga makab-ot ang status nga walay rabies pinaagi sa pag-target nga mabakunahan ang labing minos 70 porsiyento sa gibana-bana nga 90,000 ka populasyon sa hayop sa maong dapit.
Dugang ni Galaroza nga ang maong lakang aron mapugngan ang pagkatap sa rabies virus, ilabi na sa wala nabakunahi nga mga hayop.
Gitinguha ang 100 porsiyento nga coverage sa pagpa-bakuna.
Dugang niya nga himuon ang usa ka information drive sa dili pa ipatuman hangtod sa unom ka bulan aron mahibaw-an kini sa publiko.
Ang kampanya magtutok sa pag-edukar sa mga residente bahin sa ordinansa ug sa saktong mga lakang nga buhaton sa dili pa magsugod ang pagpatuman. / DPC / Yvon Maratas, Benedicto College intern