Binukbokay na karon sa Mandaue

■ BINUKBOKAY: Nagtinabisay sila si Ramil Macado (tuo) ug Lorenz Dumam-ag (wa) dihang gikuhaan sila og hulagway human sa official weigh-in sa Engkwentro 13 boxing promotion kagahapon, Abril 30, 2024, sa Bai Hotel sa Mandaue City. Naa sa tunga mao si Mandaue City Mayor Jonas Cortes. / ERWIN S. LIRAZAN
■ BINUKBOKAY: Nagtinabisay sila si Ramil Macado (tuo) ug Lorenz Dumam-ag (wa) dihang gikuhaan sila og hulagway human sa official weigh-in sa Engkwentro 13 boxing promotion kagahapon, Abril 30, 2024, sa Bai Hotel sa Mandaue City. Naa sa tunga mao si Mandaue City Mayor Jonas Cortes. / ERWIN S. LIRAZAN

Magbinukbokay na karong gabii, Mayo 1, 2024, sila si Ramil Macado ug Lorenz Dumam-ag aron ilugan ang bakanteng World Boxing Organization (WBO) Oriental flyweight title sa main event sa Engkwentro 13 - “Halad ni Mayor Jonas Cortes alang sa Kapistahan” boxing promotion sa Mandaue City Sports and Cultural Complex.

Alang ni Macado, grabe ka mahinungdanon kining maong away gumikan kay mao kini ang magsilbeng taytayan alang sa iyang pangandoy isip usa ka boksidor.

Masaligon si Macado nga modaug apan wala siya nakapasalig nga iyang ma-knockout si Dumam-ag.

“Dili lang ko mosulti nga ako siyang ma-knockout. Dili ko mopugos kay maabot ra man na ang knockout,” matod ni Macado human sa official weigh-in kagahapon, Abril 30, 2024, sa Bai Hotel sa Mandaue City.

“Importante ka­ayo ni nakong awaya.”

Ang modaug ning sangkaa gilaumang makasulod sa WBO rankings.

Sa iyang bahin, si Dumam-ag, kin­sa taga Mandaluyong City, nipadayag sa iyang dakong kadasig ug sama ni Macado, malaumon sab siya sa iyang purohan.

Si Macado, kinsa kanhi national team member ug kasamtangang sakop sa ARQ stable, naggunit og 8-0, 4KOs nga rekord samtang si Dumam-ag adunay 9-0-1, 6KOS nga baraha.

Sa co-main feature, si kanhi world champion Vic Saludar makigbatok ni Thai Sanchai Yotboon alang sa inilugay sa bakanteng WBO Oriental mini­mumweight strap.

Ang beteranong si Saludar naghupot og 24-6, 14KOs nga rekord samtang naggunit og 14-7, 9KOs nga rekord si Yotboon.

Sa undercdard, magsumbagay sila si Ian Abne (10-0-1, 4 KOs) batok Darwin Boyones (6-3, 4 KOs), Casey Morton-Croft (12-4-3, 4 KOs) batok Peeyalux Sanpokang (6-2, 5 KOs), Raffie Jamero (2-1, 1 KO) batok John Ver Espra (2-3, 2 KOs), Riel Gabunilas (3-0) batok Ronald Ewican (5-10, 2 KOs), Jhon Magos (2-0, 1 KO) batok Grant Elorza (2-4-3, 1 KO) ug Ramil Roda (3-1-2, 1 KO) batok Isagani Saludar (3-3, 2 KOs). / ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph