Nibahad si Japanese Haroki Miyamoto nga iyang pakamangon si Filipino Junibert Bantay sa ilang inilugay sa bakanteng World Boxing Foundation (WBF) Silver Youth title sa main event sa Fist of Fury VIII: Philippines vs. Japan boxing promotion karong Sabado, Agusto 16, 2025, sa Sky Hall sa SM Seaside City sa Dakbayan sa Sugbo.
Mao kini ang gipabuhagay ni Miyamoto sa katapusang press conference sa promosyon kagahapon, Biyernes, Agusto 15, sa Seaview Wing sa SM Seaside.
“I’ve been training for two and a half months for this fight. I’m very confident and you can expect a knockout,” matod ni Miyamoto nga gihubad sa english sa usa ka interpreter.
Sa iyang bahin, si Bantay nibaliwala sa bahad ni Miyamoto.
“Sa makauna lang namo. Pareha man mi nag-prepare ani,” asoy ni Bantay, kinsa sakop sa Chao Sy boxing stable sa Dakbayan sa Sugbo.
Wala man tuod siya nibawos pagbahad og knockout nga kadaugan apan gipaneguro ni Bantay nga makuha niya ang titulo.
“Dugay nako nangandoy aning awaya. Pasalamat ko sa akong promoter nga gitagaan ko ani niya nga opportunity,” matod ni Bantay, kansang manager mao si Cebu sportsman Lorenzo ‘Chao” Sy, ang tag-iya sa Chao Sy International Boxing Promotions nga maoy nagpasiugda ning maong promosyon.
Si Bantay adunay 8-0, 1KO nga rekord samtang si Miyamoto adunay 2-0, 2KOs nga rekord.
Nagkanayon ang manager ni Miyamoto nga si Akiyosi Someya nga bisan duha pa lang ka away ang nasagubang sa iyang batos sa professional rank, aduna kini impresibong rekord isip amateur boxer.
Gipadayag ni Someya ang iyang dakong pagsalig nga ma-knockout gyud sa iyang batos si Bantay.
Usa sa labing gikahinamang away sa promosyon mao ang panagsangka nila ni Jemuel Aranas sa Chao Sy stable batok Japanese Kiyoto Narukami, kinsa taudtaod na sab nag-training sa Sugbo.
Ilugan nila ni Aranas ug Narukami ang Philippine Boxing Federation (PBF) flyweight title.
Sa laing title bout, magsangka sila si Vicente Unidos sa Chao Sy stable batok Kenneth Albino sa Manila alang sa inilugay sa Philippine Youth bantamweight belt.
Mokompleto sa mga parisan mao ang tali nila ni Joperson Trazo sa Chao Sy stable batok Marlon Alejandro sa Negros Occidental, Brian Bustrillo sa Ubay, Bohol batok Justine Lumanao sa Talibon, Bohol ug John Paul Sarigumba sa mandaue City batok Apolinario Cano Jr. sa Ubay, Bohol.
Modugang og kolor sa promosyon mao ang lima ka Philippine vs. Japan amateur bouts, nga maoy unang ipahigayon sugod sa alas 5:00 sa hapon. / ESL