Sa kauban pa sila sa grupo, kauban pa sa kampanya, wala gyud bisan gamay nga bikil nilang duha. Wa gyuy madungog nga reklamo ang mga tawo kon mangampanya na ang grupo, murag maayo gyud kaayo pagkadala ang probinsiya.
Kon dunay isyu nga makadaot ug kon dunay intriga nga mogawas, magtabangay gyud silang tanan og tubag.
Ang resulta - mogawas nga ang isyu pang-intriga lang, pangdaot lang, ug nga ang tuyo pulos pamolitika lang.
Tungod niini, wa gyud bisan gamay nga isyu nga makalusot og first base, tigbak dayon kay tubagon man sa tanan nga pulos pamolitika lang.
Pero pagkahuman sa piniliay nga aduna nay nidaog, aduna sab napilde, nausab na dayon ang dagway sa kanhi grupo.
○ ○ ○
Kadtong napilde hinay-hinay nga nibalik sa naandan nga paagi - birada wala ug tuo na dayon, pero pasumbingay pa to sa primero.
Unsa may rason nga nibalik na man og birada?
Kay nagtuo siya nga modaog siya kon patuhuon niya ang mga botante nga kontra siya sa pangurakot, nga gukdon niya ang mga kurakot, dili siya modawat og kuwarta, ug labi na nga dili siya mamalit og boto. Nagtuo siya nga kon dili siya mamalit og boto, ang iyang mga kauban dili sab mamalit ug mokuyog sa iyang krusada nga way palitay og boto panahon sa piniliay.
Tungod niining maong pagtuo, balilkbalikon niya kini paglitok panahon sa kampanya kay nagtuo siya nga mao kini gusto sa mga tawo - nga walay hiphip o palitanay og boto panahon sa piniliay. Tungod sa iyang kaignorante sa politika, wala pud niya mabantaye nga siya ra usa ang nagsulti og way palitay og boto panahon sa kampanya, wala gyud bisan usa sa iyang mga kauban ang niuyon sa iyang krusada o niuyon nga husto ang iyang krusada. Siya ra gyud usa gayawyaw nga dili mamalit og boto.
Tuod man, pag-ihap pa sa mga boto, nangamote intawon ang nagsulti nga dili mamalit og boto ug hilabihang pildiha. Sa primero, naglisod siya pagtuo ug pagdawat nga mapilde siya kay minilyon gyud ang iyang friends sa pisbok, siya gyud abibahan sa mga tawo og labing kusog kon tingkampanya na, ug pirmi gyud siya maulahi kay daghan kaayo magpa-picture niya. Lupig pay artista kon mangampanya na siya.
Pero sa nakita niya nga nangamote intawon ang iyang boto, hinay-hinay niya nadawat nga taphaw ra diay ang iyang kailado, ug dili diay makapadaog ang daghan kaayong friends sa pisbok.
Gisugnoran dayon siya sa iyang mga loyalists sa pisbok nga gi-junk siya sa grupo, wala siya iapil sa sample ballot ug gipulihan lang og laing pangalan ang sample ballot sa grupo ug wala na siya maapil sa lista sa botohan.
Tuod man, sakay pud dayon siya sa front seat sa maong intriga og maoy hinungdan nga nakahunahuna siya nga sugdan na lang pud niya'g birada ang iyang kanhi mga kauban sa grupo.
Karong panahona, buto-buto dayon ug pitla-pitla lang ang iyang baba kon pangutan-on og nganong napilde siya sa miaging piniliay - gi-junk kuno siya kay pulos kurakot ang iyang mga kauban samtang siya ra ang tarong sa grupo.
Wala’g tuo na ang iyang birada sa iyang pisbok ug pirmi na siyang magpagawas sa mga kwestiyonable nga mga transaksiyon sa lokal nga pangagamhanan.
Kada adlaw, mga birada ug batikos ra gyud ang unod sa iyang pisbok, murag mao na lang gyud iyang trabaho matag adlaw ang pagpangita og sayop sa iyang mga kauban kanhi.