Aron mas mapalawman ang kahibalo sa pamalaod ug pagpanday og balaud, lakip sa nakapasar ug nadawat sa labing unang Juris Doctor program sa Cebu Normal University (CNU) si Vice Governor Glenn Anthony Soco.
Si Soco nalakip sa mga ni-qualify human mipasar sa pasulit sa maong programa diin anaa kini sa ika-46 sa kinatibuk-an nga 100 nga nakapasar sa Hulyo 18, 2025.
Matod ni Soco dako ang iyang garbo ug kalipay nga lakip siya sa pioneering batch sa programa sa maong tunghaan.
“As Vice Governor of Cebu and Presiding Officer of the 17th Sangguniang Panlalawigan, working with our 19 dedicated Board Members, I know how much law and legislation shape the lives of our fellow Cebuanos. That’s exactly why I want to deepen my understanding—to serve better, to lead wiser, and to grow continually,” matod ni Soco pinaagi sa text sa Superbalita Cebu sa Hulyo 18, 2025.
Iyang gidugang nga dugay na usab niya nga damgo nga mahimong abogado ug subay sa katungdanan nga iyang gihuptan, gilantaw niining insaktong kahigayunan nga motungha pag-usab.
Gidasig usab ni Soco ang ubang mga public servants nga dili mohunong sa pagtuon ug pagpalawom sa kahibalo alang sa mas malambuon nga pagduma.
Si Soco gradwado sa kursong Bachelor of Science in Industrial Engineering sa University of San Carlos sa wala pa kini mosulod sa politika. (ANV)