Nasikop ang usa ka lalaki human nasakpang nangawat sa balay ni Bise Mayor Noel Hormachuelos sa Panglao, lalawigan sa Bohol sa Miyerkules sa kaadlawon, Mayo 1, 2024, sa Purok 5, Barangay Bil-isan.
Giila sa kapulisan ang suspek nga si Jobert Yade Hormilleja, 33, minyo, residente sa nahisgutang dapit.
Si Hormilleja gikataho’ng nisulod sa balay sa bise mayor pinaagi sa pagguba sa pultahan sa luyo ug dayon nipaingon sa kwarto sa biktima.
Apan nasakpan siya sa bise mayor hinungdan nga niikyas apan nadakpan sa mga residente sa dapit.
Ang suspek gitugyan ngadto sa nirespondeng kapulisan ubos ni Panglao Police Station Chief Major John Khalev Sanchez.
Nabawi sa kapulisan ang P3,000 nga kwarta nga nakuha sa suspek.
Nasayran nga nakasulod usab og balay ang suspek kaniadto, apan wa madakpi. / DVG