Gilusad sa Metro Pacific Tollways Corp. (MPTC) ang pagpalig-on sa seguridad diha sa kadalanan aron sa pagsiguro sa hapsay ug luwas nga biyahe alang sa mga motorista.
Sa press statement, gipahibalo sa MPTC ang paglusad sa ilang “Biyaheng Arangkada Semana Santa” nga magpadayon gikan sa Abril 16 ngadto na sa Abril 21, 2025.
Gipanglantawan nga mosaka ang volume sa trapiko og 10 porsiyento atol sa holiday.
Si MPTC President ug Chief Executive Officer Jose K. Ma. Lim nagkanayon nga ang programa magpakita sa tinguha sa ilang kompaniya mga ma atiman ang mga motorista ug masiguro nga ang mga pamilya mobiyahe nga malinawon.
“MPTC’s role during Holy Week goes beyond traffic management by taking measures towards ensuring a travel experience that’s safe, seamless, and reassuring Biyaheng Arangkada Semana Santa reflects our commitment to service that anticipates the needs of our motorists and helps families reconnect and travel with peace of mind,” matod ni Lim.
Ang programa magtanyag og lig-on nga mga serbisyo uban sa suporta sa tibuok network sa expressway sa MPTC, lakip ang Cebu-Cordova Link Expressway (CCLEX).
Ang mga serbisyo sa CCLEX naglakip sa enhanced traffic management ug libre nga towing ngadto sa pinakaduol nga exit alang sa mga sakyanan nga Class 1 ug Class 1M, nga makasinati og aberiya.
Ang towing operation himuon sa duha ka hugna: una gikan sa Miyerkules, Abril 9 sa alas 6 sa buntag hangtod Lunes, Abril 14 sa alas 6 sa buntag, ug ang ikaduha gikan sa Miyerkules, Abril 16 sa alas 6 sa buntag hangtod Lunes, Abril 21 sa alas 6 sa buntag.
Ang mga serbisyo on-call alang sa mga emerhensya sa dalan nga ma tawag sa hotline (1-35000) ug ang MPT DriveHub app, magamit sa tibuok adlaw ug gabii.
Duna say libre nga on-call emergency medical services sa higayon nga dunay emerhensya sa mga expressway. / CDF