Usa ka biyuda nga motambong unta og husay sa barangay hall gipusil-patay sa riding in tandem sa Lunes sa buntag, Hunyo 3, 2024.
Ang pagpamusil nahitabo sa Sityo Cabcabun, Brgy. Bongalonan, Basay, Negros Oriental. Ang biktima giila nga si Roselle Cayam, 32 , nagpuyo sa nahisgutang dapit.
Sa pasiunang imbestigasyon sa kapulisan sa Basay Municipal Police Station, nasayran nga ang biktima nag-angkas sa usa ka motorsiklo kuyog sa iyang anak nga lalaki nga menor de edad.
Ang motorsiklo nga gisakyan sa biktima gituparan og laing motorsiklo ug ang backrider nipusil kang Cayam, kinsa naigo sa iyang aping ug nahu'g sa gisakyan niini nga motorsiklo.
Nadala pa sa Basay Rural Health Unit si Cayam apan gideklarar nga dead-on-arrival sa mananambal. Gisubay ang posible'ng away sa yuta nga maoy hinungdan sa pagpatay.
Nasayran nga kaniadto gikataho’ng natigbasan na si Cayam gumikan sa away sa yuta. / DVG