Namatay niadtong Lunes, alas 9:30 sa gabii, Nobiyembre 13, 2023, ang usa ka biyudo nga gipusil sa anak sa babaye nga giingong iyang uyab sa Brgy. Tapon, Dalaguete, habagatang Sugbo.
Nasuta sa kapulisan nga nangigi ang anak kay giingong giuyab sa biktima ang iyang inahan.
Ang biktima giila nga si Bienvinido Entice, mag-uuma, taga Tapon, Dalaguete, samtang ang suspek giila nga si Alvin Tangpos, 23 , ulitawo, taga Sityo Lugsangan, Brgy. Tapon.
Base sa nakuha’ng kasayuran sa Superbalita Cebu gikan sa kasaligang tinubdan, ang suspek nasuko kang Entice kay nganong giuyab ang iyang inahan nga buwag na sa iyang amahan.
Samtang diha sa su’d sa ilang open nga payag kuyog sa iyang anak lalaki nga si Michael John nga nag-istoryahanay, matod pa, sa kalit lang niabot ang suspek, gipusil ang biktima tumong sa agtang.
Ang kapulisan sa Dalaguete nga gipangulohan sa ilang hepe nga si Police Maj. Clemente Ceralde Jr., dali nga niresponde sa pagpamusil.
Ila pang naabtan ang biktima nga nalup-og su’d sa iyang payag apan ang suspek nakaeskapo na.
Ang biktima gidali unta sa pagdala sa tambalanan apan namatay gumikan sa iyang samad pinusilan sa agtang.
Ang suspek wa pa madakpi sa kapulisan ning pagsuwat sa taho.