Nanimaho og niburot na ang lawas sa usa ka senior citizen dihang napalgan siya sulod sa iyang lawak alas 10 pasado sa buntag, Hulyo 8, 2025, sa Purok Lower 1, Barangay Tunghaan, Lungsod sa Minglanilla.
Giila ang biktima nga si Alfredo Bacor Dy, 76 anyos, biyudo.
Ang mga sakop sa Municipal Disaster Risk Reduction and Management Office kon MDRRMO, kauban ang mga kapulisan, opisyales sa barangay, ug mga kaliwat sa biktima ang nisulod sa balay human makadawat og report nga dunay nanimaho gikan sa maong dapit.
Nadiskubrehan sa mga awtoridad ang biktima nga anaa sa sawog sa iyang lawak nga naghayang ug wala nay sapot ug hapit na kini madugta.
Subay sa imbestigasyon sa Minglanilla Police Station, wala silay nakita nga foul play sa kamatayon sa biktima sanglit wala ra sab nangawala ang mga gamit sa sulod sa balay.
Nasayran gikan sa kaliwat sa biktima nga daghan na kini og gipamati nga sakit ug aduna na kini maintenance nga ginainom.
Tungod niini, gituohan nga ang hinungdan sa kamatayon sa biktima mao ang atake sa kasing-kasing ug wala kini mabantayi dayon sanglit nag-inuĀsara na lang siya nga nagpuyo sa iyang balay. / JDG