Biyudo wa kadawat nga gibuwagan, magtiayon gibunala’g bara de kabra ug gipangduslak, alas 8:30 sa buntag sa Lunes, Hunyo 24, 2024 sa Brgy. Tapol, Lungsud sa Tabogon, amihanang Sugbo.
Ang suspek giila nga si Jundie Monterola, 46, construction worker, kinsa nitahan sa kapulisan.
Samtang ang biktima gitago sa ngala’ng Riz, 42, kinsa nasamdan sa iyang mga kamot ug buko-buko agi og dinunggaban sa screw driver. Ang bana nga si Roy, 47, samdan sab sa nagkadaiyang bahin sa lawas, nabali pa ang wala nga bukton ug adunay fracture sa ulo human bunali og tubo.
Si Police Corporal Socrates Bacalso, Jr., imbestigador sa Tabogon Police station nga nahinabi sa Superbalita Cebu, nagkanayon nga ‘love triangle’ ang motibo sa kremin.
Giingong ang suspek nagdumot kay wa kadawat nga gibuwagan sa babaye’ng biktima.
Sa inisyal nga imbestigasyon, gikataho nga adunay hilom nga relasyon sila si Riz ug Monterola kaniadto, apan nakahukom ang biktima nga tapuson na ang ilang ‘bawal na pag-ibig.’
Sigun pa sa asoy ni Riz ngadto sa kapulisan nga sa miaging buwan ug niadtong lang miaging semana, nagpunay og text ug call si Monterola kaniya kay gusto nga makigbalik, apan wa niya tagda.
GI-ATANGAN
Nakahigayon ang suspek niadtong Lunes nga mobawos sa kasakit nga iyang nahiaguman pinaagi sa pag-atang sa mga biktima.
Ang mga biktima nagsakay sa motorsiklo gikan nagkawos og tubig ug paingon na unta mopauli sa ilang balay.
Apan gisugat ni Monterola og hapos sa bara de kabra ang bana nga nag-drive sa motorsiklo ug naigo sa agtang resulta sa pagkalamba sa mga biktima.
Wa pa natagbaw ang suspek, giusban pa og bunal ang bana hinungdan nga nabali ang bukton, samaran sa agtang ug ubang bahin sa kalawasan.
Sa dihang giduslak pa sa suspek sa bara de kabra ang dughan sa biktima, nidepensa si Riz ngadto sa iyang bana nga niresulta sa komosyon.
Dinhi na nikuha og screw driver si Monterola ug giatubang si Riz ug gisigehan og duslak hinungdan nga nagkasamad-samad ang mga kamot sa pagpunay og sagang.
Aduna say mga samad dinuslakan sa iyang buko-buko.
Ang mga silingan dali nga ningtabang sa mga biktima ug gidala sila sa tambalanan sa dakbayan sa Bogo.
Sa pag-abot sa mga polis, nisurender ra sab ang suspek.
“Nag-uros-uros iyang gugma sa babaye. ‘Love triangle’ ang motibo. Dili siya makadawat nga mobiya na niya sa hingpit ang babaye,” dugang ni Bacalso.
Kasong double frustrated murder ang giandam sa kapulisan batok kang Monterola. / GPL