Usa ka blogger nga giingong nagmaoy sa kahubog sa diskuhan ug ug giingong nagpakita sa armas napusasan, ala 1:05 sa kaadlawon sa Dominggo, Enero 28, 2024, sa Sitio Lomboy, Barangay Liburon, dakbayan sa Carcar.
Si Arthur Leodivino Villanueva Perez III, alyas Ardiente Perez, 29, ulitawo, taga Sitio Bas, Brgy. Perrelos, Carcar nabilanggo sa Carcar City police station.
Siya naila sa iyang mga blog nga si Ardiente Perez.
Si Police Corporal Argie Noel Espinosa, imbestigador sa Carcar Police Station nga nahinabi sa Superbalita Cebu, nagkanayon nga si brgy. councilor Inocentes Amistad sa Liburon maoy nireklamo batok sa suspek.
Kini human nakuyawan ang mga tawo sa diskuhan kay fiesta dihang nagmaoy, gipakita sab niya ang armas nga giluklok nga kalibre.45 nga pistola.
Tungod niini, gialarma ug napusasan siya sa kapulisan.
Hinuon, dunay igong legal nga dukomento sa armas nga kalibre. 45 ang suspek.
“Kanang hubog naman nagbinastos daw ni siya. Unya nagpakita sa armas nakuyawan mga nag disco,” dugang ni Espinosa.
Nangayo og pasaylo ang suspek sa iyang nabuhat apan siya gipasakaan og kasong alarm and scandal.