Sa mga nagplano nga mosuroy uban ang tibuok pamilya, tapok-tapok sa barkada o ba kaha kadtong naglaraw og outing sa inyong mga kauban sa trabaho apan apiki sa pundo, ania’y lugar nga dili makabuslot sa bulsa.
Ang Blu-Bay-U Resort sa Suba-Sabang, Isla sa Olango nga nasakop sa Dakbayan sa Lapu-Lapu.
Ang maong resort siguradong maghatag kaninyo og “wallet-friendly escape where relaxation meets affordability.”
Sa entrance fee nga P20, ma-enjoy na nimo ang lugar gikan sa mga kalingawan ug kalihukan nga gitanyag ingon man ang baybayon nga gi-atbangan og islet, samtang sa unahan makita ang Lalawigan sa Bohol
RESORT
Ang anak sa tag-iya nga si Chiqui L. Bagano nagkanayon nga ang resort na-acquire sa iyang mga ginikanan niadtong 2008 nga gitukoran nila og rest house nga exclusive for family use.
Apan nahukman sa mga Bagano nga buksan kini ngadto sa publiko niadtong 2010 diin mga locals ug mga dayo midagsa sa maong lugar.
Tungod kay inanay nang nahimo’ng suroyanan sa publiko, ang Blu-Bay-U Resort nagtukod og cottages diin makapasilong ang mga guest tibuok adlaw ug ilang gipa-improve ang lugar.
UNSAY NAA?
Gipahibawo ni Sir Chiqui nga gawas nga magkalingaw og sawom sawom sa kadagatan ang mga manuroy, ang lapad nila nga beach front adunay volleyball area diin achieved kaayo ang beach volley sa kadtong mahiligon sa maong sports. Aduna ray bola nga ikapahuwam ang resort.
Gawas pa, adunay kayaking sa tag-P100 ang abang sa tibuok na adlaw’ng gamit. Mamahimong magbugsay paingon ngadto sa bakhawan, alang sa added adventure.
Pwede sab mag-camping apan bring your own camping tent nga perfect nga chillaxation sa mga magtiayon, manag-uyab o managhigala.
Adunay mini store sa maong property sa kadtong buot mopalit og softdrinks, condiments (suka, patis, asin ug uban pa), ug chichirya.
Mamahimo sab nga mamalihug sa caretaker sa Blu-Bay-U nga magpapalit og lab-as nga seafoods, nga inyong ipasugba.
Apan kon aduna moy bawon mamahimo’ng mangunay og sugba.
FEES
Kani maoy labing importante sa tanan sa bisan unsa nga lakaw ug kalihukan gikinahanglan nga masayod kita kon pila atong andamon ilabi na niadtong mga nagdaginot.
Entrance fee – P20 matag tawo apan kadtong bata nag-edad og 7 anyos paubos libre, cottage – P500 nga masudlan og 15 ka tawo. Sa kadtong magdala sa ilang kaugalingong tent adunay charge nga P100.
Way corkage fee sa magdala sa ilang kaugalingong pagkaon ug ilimnon.
UNSAON PAG-ADTO?
Manukad sa Angasil Port sa Barangay Mactan, mainland Lapu-Lapu, sakay og pumpboat o fast craft nga sud sa 15 minutos nga mobiyahe sa tag-P40 matag pasahero.
Inig dunggo sa Santa Rosa wharf sa Olango, adunay linya sa mga traysikol nga mamahimong inyong sabuton ang drayber nga magpahatod direkta sa Suba-Sabang o a Blu-Bay-U Resort sa tag-P20 ang plete matag pasahero.
Alang sa dugang ninyong pangutana, mamahimong makatawag sa 09177093310 o message sa ilang Facebook page nga Blu-Bay-U Beach Resort.
Manuroy na ta!