‘Blue man’ na-trap sa drainage, naluwas

‘Blue man’ na-trap sa drainage, naluwas
MISULOD: Mao kini ang inila nga si Blue Man nga magbarogba­rog sama og estatuwa, labina sa downtown sa Dakbayan sa Sugbo aron ang iyang kita ikasuporta sa iyang pamilya. Niadtong Dominggo sa buntag, Hunyo 30, giluwas siya gikan sa usa ka imbornal sa Brgy. Maguikay, Dakbayan sa Mandaue. TAMPO

Usa ka hamtong nga lalaki, nga mas naila nga si ‘Blue Man’, nakaplagan nga na-trap sa drainage canal sa Dalan S. Cabahug, Sityo Sudlon, Brgy. Maguikay, Dakbayan sa Mandaue, pasado alas 9 sa buntag sa Dominggo, Hunyo 30, 2024.

Nasayran kini sa Superba­lita Cebu sa pakighinabi kang Kyle Gumera, pangulo sa Maguikay Emergency Rescue Team pinaagi sa phone interview.

Si Blue Man kun si Marvin Lastimoso sa tinuod nga kinabuhi, taga Salvacion, Brgy. Maguikay, nagpangidaron og 40, nag-viral kanhi sa social media tungod sa iyang pagpintal og blue sa tibuok lawas.

Gitawag sab siya og ‘Statue Man’ tungod sa iyang pagba­rog nga sama sa estatuwa sa karsada.

Matod ni Gumera, nakadawat sila og tawag sa mga tawo nga nagpa-check-up sa usa ka klinika sa maong dapit nga dunay kamot sa tawo nga niguho gikan sa lungag sa puthaw nga takob sa maong drainage.

Ang Magukay ERT niresponde sa alarma ug ilang giukab ang takob sa drainage uban sa pag-abag sa Mandaue City Disaster Risk Reduction and Management Office (MCDRRMO) ug Bureau of Fire Protection (BFP) sa Mandaue City.

Matod pa nga sa pag-abli nila sa semento nga takob sa drainage, didto sa ubos si Blue Man nga nagkurog nga nangayo og tubig tungod sa kauhaw.

Si Gumera nagkanayon nga sa ilang pangutana kon nganong niabot siya sa ilawom sa drainage, ilang nasayran nga niagi siya sa imburnal nga ang intrada sa Pacific Mall, nga dili mominos 800 metros ang gilay-on gikan sa dapit diin siya naluwas.

Matod pa nga sa gabii sa Hunyo 29, 2024 nakit- an siya nga nagbarogbarog sa Pacific Mall apan wa na masayri kon unsang orasa nga nisud sa imburbal.

Giudahan sa mga rescuer nga wa sa maayong panghuna-huna si Blue Man human dili na kaayo motubag sa ilang mga pangutana.

Siya gihatagan og trabaho sa Kagamhanan sa Dakbayan sa Mandaue ubos sa pamunoan ni Mayor Jonas Cortes human masayri ang iyang sitwasyon.

Gihatagan usab siya og P30,000 nga hinabang.

Ang kita niya sa pagbarog sa downtown mao ang iyang gigasto alang sa pamilya. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph