Nagpadayon ang sunodsunod nga sunog sa Sugbo sulod ning pag-obserbar sa Fire Prevention Month.
Usa ka dakong bodega sa plastic ug mga karton sa White Road, Brgy. Inayawan, Siyudad sa Sugbo nasunog alas 12:05 sa hapon sa Huwebes, Marso 21, 2024.
Ang Cebu City Fire Office (CCFO) niisa sa sunog sa first alarm sa ala 1:12 sa hapon, 2nd alarm sa ala 1:18 sa hapon ug 3rd alarm sa ala 1:41 sa hapon.
Mao kini hinungdan sa pagtubag na sa ubang mga fire truck gikan sa kabumberohan sa mga kasikbit nga local government units (LGUs).
Alas 5:37 na sa hapon gideklarar nga fire under control apan, atol ning pagsuwat, wala gideklarar nga fire out.
Base sa usa ka taho sa sibyaanang dyLA, ang tag-iya sa bodega giila nga magpapatigayong magtiayon nga Rustom ug Lotlot Ignacio.
Matod pa, ang kabumberohan naglisod og pawong sa kayo gumikan kay nagliundok kini nga mga plastic, karton ug mga sako.
Wa dayon mahatag sa mga bombero ang bana-bana sa danyos apan, dunay gisubay sa ilang imbestigasyon nga posible nga hinungdan sa pag-ulbo sa kayo.
Usa niini ang giingong dunay upos sa sigarilyo nga nalabay sa mga plastic o karton ug dunay estorya usab nga dunay naghiling og kayo sa dapit.
‘KAINGIN’
Samtang, sama sa dunay nagkaingin tungod sa pagkasunog sa Mount Takli-ad sa Brgy. Conalum, lungsod sa Argao , alas 3 sa hapon sa Miyerkules, Marso 20, 2024, nga nilunftad hangtod sa alas 9:00 sa gabii sa samang adlaw.
Sa pakisusi sa Superbalita Cebu sa Municipal Fire Marshal sa Argao nga si Sr. Insp. Archie Custodio, nasayran nga lisod ang pag-agi sa mga bombero sa dapit nga nasunogan tungod sa kataas sa bukid.
Matod pa, moabot og duha ka oras kon lakwon gikan sa ubos nga bahin sa maong barangay hinungdan usab sa ilang pagpaalerto sa mga molupyo bahin pagkatay sa kayo.
Base sa update gikan ni Ramil Ramirez Omboy, operator sa Argao Command Center, alas 7:00 sa buntag sa Huwebes, Marso 21, 2024 , nakita nga wa nay kayo ang Mount Takli-ad.
BANGKA
Samtang sa kadagatan sa Sityo Lintub, Brgy. Nagbo-alao, lungsod sa Basay Negros Oriental, usa ka fishing boat nasunog, alas 11: 30 sa buntag sa Huwebes, Marso 21, 2024.
Ang maong fishing boat nagngan og ‘Quadro Alas’ nga nakarehistro sa ngan sa usa ka Delphen Colagbang Sr. ug kini dunay 23 ka mga tripolante.
Sa interview sa mga tigbalita kang P/LT. Stephen Polinar, spokesperson sa Negros Oriental Provincial Police Office (NOPPO), siya nagkanayon nga under investigation pa atol ning pagsuwat ang pagka sunog sa bangka.
Hiinuon, dali ra nga naluwas ang tanang tripolante sa mga rescue team nga gipangulohan sa Philippine Coast Guard (PCG).