NASIKOP sa mga sakop sa Provincial Intelligence Unit sa Cebu Police Provincial Office (CPPO) ang usa ka bodegero dihang nakuhaan og ilegal nga drugas ug siya sab ang mohatod niini sa iyang customer atol sa gilusad nga buy-bust alas 12:48 sa buntag, Miyerkules, Hunyo 25, 2025, sa Purok Atis, Barangay Maghaway, Siyudad sa Talisay.
Ang nadakpan giila nga si Boyet Villarta Tapic, 45, construction worker nga residente ra sab sa maong lugar.
Nakuha gikan kaniya ang mga dagkong putos sa gituohang shabu nga motimbang sa 35 gramos nga dunay standard drug price nga P238,000.
Nangulo sa operation mao si Police Lieutenant George Villar Jr .
Ang suspek usa ka semana nga gipaubos sa monitoring sa kapulisan human nigawas ang iyang pangalan nga maoy hagbunganan sa suplay sa ilegal nga drugas.
Giingong makabaligya siya og 300 gramos nga shabu matag duha ka semana ug ang iyang contact naa sa sulod sa Abuyog Penal Farm sa Abuyog, Leyte.
Naa na’y pangalan ang kapulisan sa contact ug nakig-coordinate na sa Bureau of Correction nga maoy nag-supervise sa mga binilanggo sa Abuyog.
Makatulo sa usa ka semana nga hatdan sa suplay sa ilegal nga drugas ang suspek ug suholan kini og P500 matag deliver.
Ang iyang area nga suplayan sa ilegal nga drugas mao ang mga Lungsod sa San Fernando, Minglanilla, ug Siyudad sa Talisay.
Kalapasan sa Section 5 ug 11, Article II, Republic Act 9165 ang ipasaka sa CPPO batok sa suspek. / AYB