Naila isip usa ka nag-uswag nga 5th-class municipality sa Lalawigan sa Bohol, ang Lungsod sa San Isidro nipalig-on sa ilang reputasyon isip nagbutang sa ilang katawhan nga sentro sa kalambuan pinaagi sa Community-Driven Development (CDD) nga pamaagi.
Niadtong Abril 7-8, 2025, gipahigayon ang coaching session bahin sa infrastructure, financial management, ug Republic Act 9184 (Procurement Law) uban sa mga boluntaryo sa Kapit-Bisig Laban sa Kahirapan-Comprehensive and Integrated Delivery of Social Services (Kalahi-CIDSS) nga usa sa mga inisyatiba nga nagsimbolo sa padayon nga paningkamot sa lungsod alang sa participatory governance.
Gisugdan sa San Isidro ang pakigtambayayong sa Department of Social Welfare and Development (DSWD) pinaagi sa Kalahi-CIDSS sukad pa sa 2014. Sa tuig 2023, gisugdan na sa lokal nga kagamhanan ang pag-institutionalize sa CDD ug duha ka tuig ang milabay, giaprobahan ang Ordinansa Blg. 11 aron pormal nga palig-unon ang CDD isip estratehiya sa lokal nga pagdumala sa tanang 12 ka barangay.
Gipahugtan sa maong ordinansa ang papel sa komunidad sa pag-ila sa ilang mga panginahanglan, pagprayoridad sa mga proyekto, pag-apudapod sa pundo para sa imprastruktura ug sosyal nga serbisyo, ug paggamit sa Community Empowerment Activity Cycle (CEAC) isip giya sa malungtarong pagplano.
Sa pagkakaron, ang 12 ka barangay sa San Isidro nga mao ang Abejilan, Baryong Daan, Baunos, Cabuangun, Caimbang, Cambansag, Candungao, Cansague Norte, Cansague Sur, Causwagan, Masonoy, ug Poblacion ang nakapatuman matag-usa sa ilang kaugalingong barangay road concreting project nga napili base sa participatory consultations sa ilang komunidad.
Gisuportahan kini sa Municipal Local Government Unit (MLGU) pinaagi sa Executive Order nga nagtugot og P200,000 nga Municipal Counterpart ug P200,000 nga Barangay Counterpart matag proyekto.
Ang maong shared funding scheme naghatag og gahum sa barangay aron mahimong responsable ug independenteng implementor sa ilang imprastruktura.
Aron mapalig-on ang performance ug transparency, giaprubahan sa MLGU ang Ordinansa Blg. 1, Series of 2025, nga nagtanyag og P20,000 nga insentibo sa mga barangay nga labing maayo sa Best in Liquidation, Implementation, ug BDC-TWG Functionality.
Kini nga result-based reward system nakapadasig sa mga opisyales ug miyembro sa komunidad sa hapsay ug tukmang implementasyon sa mga proyekto.
Gumikan sa Participatory Organizational Capacity Assessment (Poca) uban sa mga lokal nga People’s Organizations, gisugdan ni Mayor Diosdado Gementiza, CPA, JD, ang mga training ug capacity-building aron mas mapalambo ang ilang kakayahan ug partisipasyon sa mga programa sa lungsod.
Ang kalampusan sa San Isidro sa pag-ugmad sa lokal nga bersyon sa Kalahi usa ka buhing ehemplo sa gahum sa partisipasyon ug pagpaminaw sa katawhan diin ang CDD dili lang usa ka proyekto kondili usa ka palisiya nga gipalungtad alang sa lig-on, inklusibo, ug people-led progress.
Ang mga dalan nga gitukod dili lamang dalan sa pisikal nga paglihok apan dalan sab kini paingon sa empowerment, pagsalig, ug tinabangay nga kalampusan sa Lungsod sa San Isidro. / PR