Nabalhug sa Guadalupe Police Station ang 24 anyos nga boksidor kay giingong namunal og tubo sa iyang uyoan, alas 8:00 sa gabii sa Dominggo, Abril 14, 2024 sa Unit 1, Oppra, Barangay Kalunasan, dakbayan sa Sugbo.
Ang suspek giila nga si Mc Owen Ralf Tajanlangit, 24, nagpuyo sa maong lugar, naila nga amateur boxer sa Central Visayas.
Ang biktima nga nakaangkon og samad binunalan sa ulo mao si Delson Dagatan Tañon, 33, silingan ra usab sa suspek.
Sa imbestigasyon sa Guadalupe Police Station nasayran nga nasuko ang suspek nga gipasanginlan sa iyang uyoan nga matod pa gihapak niini ang ulo sa iyang manghod.
Napungot ang suspek ug giingon nga nikuha og tubo dayong hapos ngadto sa ulo ug ubang bahin sa lawas sa iyang uyoan nga niresulta sa pagkasamad niini.
Dali nga nanawag ang mga silingan og barangay tanod ug malampuson nga nadakpan ang boksidor nga gi-turnover sa Guadalupe Police Station.
Giangkon ni Dagatan nga iyang nahimo ang paghapak og tubo sa iyang uyoan tungod sa kalagot nga nag apil-apil sa away sa iyang manghod.
Kasong physical injury ang ipasaka batok sa suspek. / AYB