Sama sa mga niaging duwa nanghasi napud ang import sa TNT Tropang 5G nga si Bol Bol ug gidala ang iyang team ngadto sa 119-112 nga kadaogan batok sa Macau Black Knights sa Philippine Basketball Association (PBA) Season 50 Commissioner’s Cup niadtong Biyernes sa gabie, Abril 24, 2026, sa Smart Araneta Coliseum.
Ang kanhi NBA player nga si Bol nipakatap og 37 puntos ug 14 rebounds aron dalhon ang TNT ngadto sa 6-3 (win-loss) sa nagpadayon nga elimination round.
Tungod niini, buhi pa ang paglaom sa TNT nga makasulod sa Top 4 nga adunay ganti nga twice-to-beat advantage sa ilang pagsulod unya sa quarterfinals.
Niining tungora ang katabang ni Bol mao si Jordan Heading kinsa nipasulod sa iyang duha ka free throws sa nahabiling 23 segundos.
Gipaubsan unta sa Black Knights ang labaw sa TNT ngadto na lang sa usa ka puntos, 113-112, sa nahabiling 26.3 ka segundos sa dula human niinit ang opensa ni Damian Chongqui.
Apan wa kini makalahutay kay napugngan man sa TNT ang suway nga pagsilat sa Black Knights.
Tungod sa ilang 1-8 nga rekord, ang Black Knights mao ang nahimong unang team nga natagak niining mid-season conference. / RSC
