Nabuhian og paglaum ang Boljoon human nila gipangbuntog ang kuwangan og tawo apan determinadong Sibonga, 90-75, niadtong Dominggo sa gabii, Abril 7, 2024, sa Mayor Inocentes Cabaron Invitational Inter-town basketball tournament sa covered court sa lungsod sa Moalboal, Cebu.
Ang Boljoon, nga nasubhan og pilde batok sa Barili, 89-73, unya namungot sa Badian, 82-80, sa nag-una nilang duha ka mga duwa, naggunit na karon og 2-1 nga rekord sa Group B diin nagsunod sila sa group leader Dalaguete (3-0) ug Samboan (2-0).
Nakuha sa Dalaguete ang liderato human sa sagunson nilang kadaugan batok sa Sibonga, 95-86, niadtong Abril 6 ug Barili, 72-65, niadtong Abril 7.
Batok sa Sibonga, nga aduna ra’y pito ka mga magduduwa, daw paingon na sa hingpit nga dominasyon ang Boljoon dihang nakaposte sila og 24-12 nga labaw sa sayong bahin.
Human niini, ang Sibonga ningsandig og maayo sa abilidad ni Ehman Janson Suarez aron pahakan ang labaw sa Boljoon, 46-44, sa halftime.
Apan pagsugod sa 3rd quarter, giyatakan na sab sa Boljoon ang gasolinador sa ilang opensa sa pagpangulo nila ni Kenjie Gumera ug Epoy Caneda aron inaton og balik ang ilang labaw, 69-59.
Wala na nakabangon pagbalik ang Sibonga gikan niini hangtod na sa katapusang gutlo.
Gipangulohan ni Caneda ang Boljoon pinaagi sa iyang 26 puntos samtang niamot og 15 puntos si Gumera. Ang Sibonga gipangulohan ni Suarez pinaagi sa iyang 31 puntos.
Sa Group A, ang Dumanjug yanong nirehistro sa ikatulo nilang sunodsunod nga kadaugan gumikan kay wala nakatunga ang ilang kontra nga Malabuyoc.
Nagsunod sa Dumanjug mao ang Aloguinsan (2-1) ug Badian (1-2).
Ang kampyon sa torneyo makabulsa og P200,000, makakuha og P150,000 ang 2nd placer, P100,000 sa 3rd placer samtang P50,000 sa 4th placer. / ESL