Naangkon sa defending champions Meralco Bolts ang sayong liderato human nila gipangkuryentihan ang Terrafirma Dyip, 118-80, sa premirong duwa niadtong Dominggo, Abril 6, 2025, sa Philippine Basketball Association (PBA) Season 49 Philippine Cup sa Ninoy Aquino Stadium.
Kini maoy ikaduhang sunodsunod nga kadaugan sa samang gidaghanon nga duwa nga narehistro sa Bolts ning sayong bahin sa komperensiya.
Si CJ Cansino, kinsa igo lang nimugna og duha ka mga puntos sa premirong daog sa Bolts batok sa Converge FiberXers, 91-89, niadtong Biyernes, Abril 4, nagbangis ning higayuna ug gipangulohan niya ang Bolts pinaagi sa iyang 19 puntos.
Nagkanayon ang usa sa mga sinaligan sa Bolts nga si Bong Quinto, wala sila nasurpresa sa gipakita ni Cansino gumikan kay bisan kinsa kanila, puwedeng moulbo ang opensa tungod sa sestima ni coach Luigi Trillo.
“Sila coach Luigi (Trillo), coach Nenad (Vucinic), talagang pinu-push nila kami. Lahat ng dapat naming gawin sa game, gawin na namin sa practice para masanay kami.
Kaya seguro lahat ng ginamit na players talagang ready maglaro,” matod ni Quinto nga napatik sa Spin.ph.
Ang Dyip, nga nasubhan og 95-87 nga daog batok sa Phoenix Super LPG Fuel Masters, daw nakalitan sa kusog nga boltahe sa opensa nga gipagawas sa Bolts sa pagsugod pa lang nga nagpalubong dayon kanila, 30-16, human pa lang sa 1st quarter.
Wala na nakabangon pagbalik ang Dyip human niini.
Sa main game, gipangmakmak sa Converge FiberXers ang Fuel Masters, 92-83.
Ang FiberXers ningsaka sa 1-1 nga rekord samtang ang Fuel Masters natagak sa 0-2 nga baraha.
Puntos matag usa:
1st game:
Meralco (118) – Cansino 19, Reyson 16, Quinto 13, Pasaol 11, Mendoza 11, Bates 11, Caram 9, Hodge 7, Torres 5, Jose 4, Almazan 4, Rios 3, Newsome 2, Black 2, Pascual 1.
Terrafirma (80) – Sangalang 23, Pringle 11, Melecio 11, Nonoy 10, Romeo 9, Catapusan 7, Ramos 6, Zaldivar 3.
2nd game:
Converge (92) - Stockton 18, Winston 14, B. Santos 12, Arana 10, Baltazar 9, Nermal 7, M. Garcia 6, Racal 5, Caralipio 5, Delos Santos 2, Corpuz 2, Ambohot 2.
Phoenix (83) - Ballungay 15, Tio 13, Salado 8, Alejandro 8, Tuffin 7, Rivero 6, Camacho 6, R. Garcia 6, Soyud 5, Ular 4, Verano 3, Jazul 1, Manganti 1. / ESL