Gisugyot karon nga hatagan og Charter Day bonus ang mga empleyado sa Mandaue City Hall.
Kini nga sugyot gipahibalo ni City Administrator Atty. Gonzalo “Sally” Malig-on Jr. atol sa media launching sa ika-56 nga Charter Day celebration sa dakbayan.
Gitaho ni Malig-on nga iyang naendorsar na ang sugyot ngadto kang Mayor Thadeo “Jonkie” Ouano, nga mopasa niini ngadto sa City Council aron aprobahan.
Ang budget alang sa maong bonus gi-finalize sa City Budget Management Office, apan wala pa matino ang eksaktong kantidad ug ang listahan sa mga makadawat niini.
Kining anunsyo nahitabo dungan sa gihimong Charter Month ceremony sa dakbayan.
Si Mayor Ouano nagpasalamat sa panaghiusa ug kakugi sa tanang Mandauehanon nga nakatampo sa kalambuan sa siyudad.
Gipahibalo usab niya nga ang tanang personnel, apil na ang mga Job Order (JO) nga nagsugod og serbisyo gikan Hulyo 1 hangtod Agusto 30, uban sa Barangay Health Workers ug Clean and Green Workers, makadawat og Charter Month incentives.
Gikumpirmar ni Mayor Ouano ang pagpatuman sa ikaduhang hugna sa salary increase alang sa mga regular nga empleyado, subay sa mando sa Department of Budget and Management (DBM).
Gipahibalo usab nga ang nalangay nga suweldo sa 10 ka departamento gipagawas na niadtong Biyernes, Agusto 8, samtang ang nahabiling 20 ka departamento makadawat sa ilang suweldo sunod semana. / CAV