Usa ka sakop sa Barangay Peace Action Team sa Basak, Compostela, amihanang Sugbo nga kanunay magpabuto sa iyang dili lisensyado nga armas nga kalibre .357 nga revolver kon mahubog, gironda sa mga sakop sa Criminal Information and Detection Group, Mandaue City Field Unit alas 4:50 sa Martes sa kaadlawon, Pebrero 6, 2024.
Ang CIDG Mandaue City Field Unit sa pagpangulo ni Police Captain Nigel Sanoy dala ang search warrant nga giluwatan ni Judge Allan Francisco Garciano nironda batok kang Dennis Pareja Yonco, 39, nagpuyo sa maong lugar.
Nakuha sa mga operatiba ang usa ka kalibre .357 revolver nga way serial number ug unom ka mga bala niini.
Matod ni Sanoy nga nakadawat sila og report gikan sa mga residente sa buhat sa suspek nga kanunay magpasalba sa armas ilabi kon mahubog nga nakapalisang sa mga silingan.
Tungod niini, gipaubos sa validation sa CIDG ug nasuta nga tinuod ang pasangil sa mga residente busa ni-apply na dayon sila og search warrant sa korte.
“BPATS na siya sa barangay, nya ang problema kay magpasalba sige, labina mahubog. Mingaw man gud na ilaha lugar medyo bukid-bukid,” paghulagway ni Sanoy.
Ang pagpang ronda kabahin sa flagship project sa CIDG nga “Oplan Paglalansag Omega” diin ang ilang target kadtong mga armas nga way lisensya.