SAULOGON unta sa graduating Criminology student nga si Ruthlyn Libradilla ang iyang kalampusan apan naputol ang iyang kinabuhi tungod sa usa ka nasugatan nga aksidente sa dalan sa Barangay Looc, Dakbayan sa Lapu-Lapu.
Si Libradilla, 26, service crew sa usa ka fast food chain ang namatay sa dihang nabanggaan sa gikasugat nga nga pickup truck sa dalan Tiangue, Looc, niadtong buntag sa Sabado, Marso 22, 2025.
Sumala sa Lapu-Lapu City Police Office spokesman nga si Lt. Col. Christian Torres, niadtong Lunes, Marso 24, ang biktima paingon sa trabaho uban sa iyang kauban nga si Sofie Mie Inot, dihang nahitabo ang maong insidente.
Matod ni Torres, usa ka puwa nga pickup truck ang ilang gikasugat ang giingong ni-counterflow resulta sa dinasmagay.
Si Inot naluwas sa maong trahedya samtang si Libradilla gideklarar nga dead on arrival (DOA) mga alas-5:30 sa buntag sa Lapu-Lapu City District Hospital. Matod ni Torres, ang 23 anyos nga drayber sa pickup truck nagpositibo sa alcohol breath test ug nadakpan sa mga miresponde nga polis niadtong Sabado.
Sa usa ka interbyu, si Emelyn Libradilla, inahan sa biktima, iyang gihulagway iyang anak nga kugihan ug nag-andam na unta nga mo-graduate karong tuiga sa University of Cebu.
Dugang pa niya, ang ilang pamilya nagplano unta sa pagkuha og congratulatory video niadtong Dominggo, Marso 23 aron sa pagsaulog sa iyang promosyon sa trabaho alang sa managerial position sa fast food chain diin siya nagtrabaho.
“Nahinayangan gyud ko niya. Sakit kaayo sa among buot nga akong anak breadwinner pa gyud sa among pamilya,” matod ni Emelyn.
Gisaysay usab niya nga ang pamilya sa suspeK Ni-text kanila, naghatag og tanyag sa pagtabang sa gasto sa lubong ug ospital, apan dili pa siya makahimo og desisyon tungod sa kasakit nga ilang gibati.
Kasong reckless imprudence resulting in damage to property, paglapas sa Republic Act No. 10586 o Anti-Drunk and Drugged Driving Law, ug reckless imprudence resulting in homicide ang gisang-at batok sa suspek.
Nisulay ang mga tigbalita sa pagkuha og pahayag gikan sa drayber sa pickup truck, apan siya nagdumili sa paghisgot bahin sa maong panghitabo.
Si Junet Inot, inahan ni Sofie, nipahayag nga ang iyang anak nakabaton og grabeng samad sa bukton, paa, hawak, ug bat-ang tungod sa paglambos sa semento.
Naghangyo siya og pinansyal nga suporta alang sa tambal sa iyang anak, apil ang operasyon, medisina, ug bayad sa wala natuman nga trabaho.
Si Junet nanghinaut nga ang responsable nga partido dili molikay sa ilang obligasyon ug plano nga magpahimo og kasabutan alang sa padayon nga suporta, tungod kay lisod usab ang ilang kahimtang pinansyal. / dugang taho ni DVG