Barangay Health Worker (BHW) ug laing duha ka kauban ang nasikop sa gilusad nga buy-bust sa mga sakop sa Philippine Drug Enforcement Agency (PDEA) 7 uban sa kapulisan sa Malabuyoc ug 703rd Maneuver Company.
Nahitabo ang operation sa Sitio Palaypay, Barangay Tolosa nga giilang drug cleared, Lungsod sa Malabuyoc alas 12:20 sa hapon, Biyernes, Agusto 15, 2025.
Ang target sa operation giila ni PDEA 7 Regional Director Joel Plaza nga si alyas June, 30, usa ka construction worker nga residente ra usab sa maong dapit.
Lakip sa nasikop ang iyang live in partner nga BHW sa Barangay Tolosa, Malabuyoc nga si alyas Jane, 23, ug alyas Marben, 30, mag-uuma nga taga Lipanto, Lungsod sa Alegria.
Nakuha gikan kanila ang 11 ka pakete sa gituohang shabu nga motimbang sa 10 gramos nga dunay balor nga P68,000.00, cash nga gituohang halin sa ilegal nga drugas, duha ka cellphone, usa ka kalibre .45 nga pistola nga dunay magazine ug tulo ka bala.
Ang mga nakuhang ebidensya giduso na sa PDEA 7 Regional Office Laboratory alang sa himuon nga chemical analysis.
Matod ni Leia Alcantara information officer sa PDEA 7 nga usa ka semana nila nga gipaubos sa case buildup ang ilang target nga si June human nigawas ang iyang pangalan nga namaligya og ilegal nga drugas.
Dugang ni Alcantara nga ang iyang kaipon nga BHW maoy iyang kaabag sa pagbaligya sa shabu gani silang duha ang target sa mga operatiba.
Giingong makabaligya si June og 10 gramos matag semana sa iyang mga customer nga iya ra usab nga mga kaila.
Nipasabot si Alcantara nga di makaapekto sa status sa barangay nga drug cleared sanglit nagpasabot kini nga na-monitor ang ilegal nga kalihukan sa mga drug personality nga maoy hinungdan nga kini nadakpan.
Kalapasan sa Section 5 ug 11, Article II Republic Act 9165 ug Republic Act 10591 o illegal possession of firearms and ammunition ang atubangon nga kaso ni June ug alyas Jane samtang laing kaso ang ipasaka kang Marben. / AYB