Konsehal sa barangay sa Lungsod sa Sierra Bullones sa Lalawigan sa Bohol ang gipusil-patay sa iyang kainom alas 11:05 sa gabii, Domingo, Mayo 11, 2025 bisperas sa adlaw sa election sa Purok 4, Sitio Cagyo, Barangay Matin-ao.
Ang biktima giila nga si Ernesto Tagle Caga, 60, biyudo nga nagpuyo ra usab sa maong lugar ug ang mamumuno ang iya ra usab nga silingan nga Medardo Galve Digal 62.
Kasamtanga’ng gipugngan sa kapulisan ang pangalan sa mga nalambigit. Sa imbestigasyon sa Sierra Bullones Police Station nasuta nga ang biktima ug ang namusil nag-inom sa balay sa ilang silingan.
Sa dihang nangahubog nagkalalis ang duha tungod sa personal nga bingkil ug diha-diha dayon nikuha og armas ang mamumuno ug gipusil ang biktima tumong sa dughan.
Daling gidala ang biktima sa Congressman Simeon Toribio Memorial Hospital sa Lungsod sa Carmen apan gideklarar nga dead on arrival sa tambalanan.
Nadakpan himuon dayon sa mga niresponding mga polis ang mamumuno nga naa sa kustodiya sa Sierra Bullones Municipal Police Station.
Nakuha usab sa mga polis sa possession sa mamumuno ang usa ka .38 nga revolver, duha ka bala ug usa ka basiyo nga nakabuto na sa iyang cylinder.
Sigun sa pamahayag sa mga saksi nga dugay na nga nagkabingkil ang duha sa personal nga atraso.
Ang hepe sa Bohol Police Provincial Office Police Colonel Arnel Banzon nibutyag nga walay kalambigitan ang election sa maong insidente.
Giandam na ang kasong murder, lakip na ang kalapasan sa Comelec gun ban batok sa suspek. / AYB