Napusasan ang usa ka barangay konsehal human siya naaktuhan sa kapulisan nga nangisyu og numero sa illegal swertres games alas 7:20 sa gabii Miyerkules Mayo 30, 2025 sa Barangay Pakigne, Lungsod sa Minglanilla.
Si konsehal Mary Ann Dayanap, 45, alyas “Ann” napusasan kay naaktuhan sa mga operatiba sa Minglanilla Police Station.
Si Dayanap, nakuhaan sa iyang possession sa daghang numbers combination sa illegal swertres games.
Wala siyay gipakita sa kapulisan nga gihatagan siyag pagtugot sa King Dragon Gaming and Amusement Corporation.
Labaw nang walay gipakita nga dukomento sama sa ID nga gitugotan siya sa gobiyerno pag-operate.
Ang konsehal mag-atubang og kasong kalapasan sa R.A 9287.
Sunod nga napusasan sa kapulisan si Casamiro Ubanos, 63, taga Barangay Tungkop, Lungsod sa Minglanilla.
Mga gambling paraphernalia lakip sa pusta ang nasakmit sa kapulisan gikan sa suspek human dayag kaayo nga nangisyu sa illegal numbers swertres games.
Nadakpan sab sa kapulisan si Virginia Arias, 46, taga Barangay Anopog, Lungsod sa Pinamungajan ug nakuhaan sa iyang possession sa daghan gambling paraphernalia. / GPL