Kapin sa 5,650 ka kilo sa non-biodegradable o kining dili malata nga basura nga nakolekta sa Barangay Luz sa Dakbayan sa Sugbo ang gi—convert sa fluff fuel, usa ka alternatibo sa coal, ubos sa pilot waste segregation project sa maong barangay nga anaa na karon sa ikaunom nga semana.
Usa ka kalihokan ang gipahigayon sa Barrio Luz National High School niadtong Sabado, Hulyo 5, 2025, nga gitambungan sa mga estudyante aron mahibalo kon unsaon pag-convert sa basura nga plastic ngadto sa fuel o mahimo kini nga eco-bricks.
Subay sa proyekto nga “Eco-Warriors,” nakunhoran na sa barangay ang ilang basura ngadto sa katunga nga gidaghanon gikan sa upat ka tonelada sa buwan sa Hunyo ngadto sa 1.5 ka tonelada nalang sa unang bahin sa Hulyo. Dinhi makita ang kaepektibo sa proyekto sa pag-promote usab sa household-level nga segregation ug pagpakunhod sa mga basura nga paingon sa landfill.
Ang tulo ka buwan nga inisyatibo, usa ka joint effort sa Junior Chamber International (JCI) Cebu, JCI Japan, ug SM GUUN Environmental Company Inc., nga mao ang nagproseso sa mga nakolekta nga basura ngadto sa fuel alang sa planta sa semento.
Tumong sa maong proyekto nga makunhoran ang pag-agad sa Dakbayan sa Sugbo ngadto sa mga landfill ug coal samtang naghatag og disiplina sa mga residente sa tarong nga paglabay sa ilang basura.
Gikolekta sa SM GUUN ang mga non-biodegradable nga basura matag Miyerkules.
“Instead of coal, they are using fluff fuel. So there’s lesser carbon emission, and our trash has a clear destination,” matod ni Johnel Luceno, JCI Cebu Vice President for Community Development.
Iyahang gihimug-atan ang kamahinungdanon sa pag-segregate sa basura tungod kay ang SM GUNN, modawat lamang og pipila ka klase sa basura.
Napilian ang Barangay Luz nga pilot area tungod sa kaandam niini sa pagtuman sa ensakto nga paglabay sa basura.
Gipakatap sa barangay ang “Eco-Warriors” aron pag-inspect kon nituman ang mga residente sa ensakto paglahi sa basura bag-o kini koklektahon.
“We invited the mayor because we can’t sustain this on our own. The city government should continue this,” dugang ni Luceno, kinsa mibutyag nga kinahanglan ang suporta sa mga institusyon human nga motapos ang pilot karong Agusto 26.
Si Cebu City Mayor Nestor Archival, kinsa mitambong sa kalihokan, mipaluyo sa maong inisyatibo ug mi-highlight sa dinalian nga pagkunhod sa gastuhan sa paglabay sa basura. / CDF, dugang taho ni John Mart Mabalhin, VSU Intern