Nadakpan sa Dumanjug Police Station ang duha ka responsable sa pagpusil-patay sa Barangay Secretary sa Tubod-Dugoan, Lungsod sa Dumanjug alas 10:00 sa buntag, Biyernes, Hunyo 27, 2025 didto ra sab sa naasoyng dapit.
Ang mga nadakpan sa gilusad nga hot pursuit mao silang alyas Teban, 51, ug ang gunman nga si alyas Conrad, 35 anyos.
Sila positibo nga gitudlo sa mga saksi nga maoy nagpusil-patay kang Celsa Regidor Redondo, 62, sa balay niini sa Sitio Purok 5, Barangay Tubod-Dugoan alas 4:00 sa kaadlawon sa Biyernes, Hunyo 27, 2025.
Matod ni Police Captain Eden Rex Baguio, hepe sa Dumanjug Police Station nga di ang barangay secretary ang target sa mga suspek kon di ang igsuon sa iyang gipaeskwela nga babaye nga naa usab magkatulganan sa iyang balay nga si alyas Ekil.
Si Ekil giingong trabahante ni alyas Teban sa dugay na nga panahon ug mao ni ang tigsaka sa lubi panahon nga mangupras ang suspek.
Apan nipahawa kini sa poder ni alyas Teban nga dunay gibilin nga dakong utang nga maoy hinungdan sa tumang kasuko sa suspek ngadto kang alyas Ekil.
Duha ka tawo ang nakasaksi sa insidente nga si Conrad ang nipusil sa biktima samtang si Teban ang nagsilbing lookout kay sa dihang nipugos ni pagsulod sa balay nakaambak sila sa bentana sa balay ni Redondo.
Samtang nagpugong ang biktima sa pultahan nga dili hingpit nga makasulod ang suspek, gipusil nila ang pultahan nga nakaigo sa tiyan ni Redondo ug gipatiran nga hinungdan nga malampusong nakasulod si Conrad sa kwarto.
Sa sulod sa kwarto, gipaluhod ang biktima nga nakita sa mga saksi ug giingong nagpaila ang suspek nga sakop sa New People's Army una gipusil ang ulo gamit ang wa pa matino nga kalibre sa armas.
Base sa gihimong background investigation sa Dumanjug Police sa biktima, wa silay nakita nga rason nga siya ang target sa mga suspek sanglit wa kini atraso sa iyang pagka barangay secretary.
Bisan paman nga pintok ug prangka nga manulti ang maong opisyal sa barangay apan gihulagway ni sa mga residente sa dapit nga buotan ug nagtinarong sa iyang trabaho.
Human makuha ang mga impormasyon ug ang pamahayag sa mga saksi, usa niini ang kanhi trabahante sa suspek, nilusad dayon ang kapulisan og hot pursuit nga niresulta sa pagkasikop sa duha.
“Ang ikaduhang buto mao to diri naigo sa iyang ulo katong nag luhod na siya, katong porma niya nga nag-facedown mao to paghuman sa ikaduhang buto, pagkahuman nitalikod ang gunman nakig-estorya sa iyang kauban nga naa sa gawas,” matod ni Baguio.
Si Alyas Conrad kanhi binilanggo sa kasong murder napulo ka tuig na ang nakalabay ug naila nga bagis sa ilang barangay.
Nidugang si Baguio nga nagkuha pa sila og dugang lig-on nga ebidensya gawas sa pamahayag sa mga saksi alang na sa pagpasaka og kasong murder sa duha ka mga suspek. / AYB