GIPUSIL-PATAY ang usa ka barangay secretary sud sa iyang lawak sa Purok 5, Barangay Tubod Dugoan, lungsod sa Dumanjug pasado alas 12 sa tungang gabii, Hunyo 27, 2025.
Ang nakabsan sa iyang kinabuhi nailhan nga si Celsa Regidor Redondo, 62 anyos, biyuda, kanhi konsehal sa maong barangay.
Una niini, nakadawat ang Dumanjug Police Station og taho nga adunay gipusil nga tawo sa maong dapit hinungdan nga dali nila kini nga gires-pondehan.
Pag-abot sa mga polis, ilang naabtan ang biktima nga naligo na sa iyang kaugalingon’g dugo sud sa iyang lawak.
Atol sa paghiling sa lawas sa biktima sa mga sakop sa Scene of the Crime Operatives (SOCO), nasuta nga nakaangkon kini og duha ka samad-pinusilan sa iyang ulo ug tiyan hinungdan sa iyang hinanaling kamatayon.
Usa ka residente nga wa magpahingan miingon nga duha ka tawo ang misaka sa balay sa biktima.
“Gisaka ilang balay og duha ka tawo nga nag-bonnet sa mga around 12 am. Ang mga bata nga kuyog sa biktima kay nanglayat sa bintana tungod intawon sa kahadlok,” kini nagkanayon.
Sa kasamtangan, nagpahigayon pa ang kapulisan og imbestigasyon aron ilhon ang suspek ug sutaon ang motibo sa krimen. / JDG