Brgy. tanod gipusil, angol

Brgy. tanod gipusil, angol
SunStar Local News GPX

Usa ka barangay tanod na­kaangkon og samad sa iyang liog dihang gipusil samtang nag-duty, alas 9:20 sa gabii, Lunes, Mayo 6, 20242, sa Sityo Lower Sayao, Barangay Sayao nga bukirang dapit sa lungsod sa Sibonga, habagatan sa Lalawigan sa Sugbo.

Si Franklin Entienza, barangay kapitan sa Sayao, nidangop sa kapulisan sa Sibo­nga aron pagpangayo og tabang human usa sa iyang barangay tanod ang gipusil.

Niresponde ang kapulisan ug gihimo ang imbestigasyon ubos sa kamandoan sa ilang hepe nga si P/Capt. Fort Antony Valdez.

Ang biktima giila nga si Emedio Gomez Gecali, 52, minyo ug molupyo sa dapit.

Matod sa biktima, duty siya ug diha kilid sa ilang barangay hall ug dunay wa mailhing tawo ang nipusil kaniya gikan sa ngitngit nga bahin hinungdan nga wala kini mailhi.

Ang biktima gidali pagtabang sa rescuers sa Sibonga ug gidala sa Cebu Provincial Hospital sa Carcar City apan gi-refer ngadto sa Vicente Sotto Memorial Medical Center (VSMMC) sa dakbayan sa Sugbo.

Samtang, atol ning pagsuwat, ang kapulisan sa Sibonga padayon sa ilang imbestigasyon aron mailhan ang nipusil sa biktima ug unsa ang motibo.

Ang Superbalita Cebu eks­klusibong nakahinabi ang usa ka pag-umangkon sa biktima nga magpatago sa iyang pangan.

Matod niya, ang iyang uyo­an gisaligan sa peace and order sa Sayao ug respitado kini sa mga molupyo sa dapit.

Kon dunay mga kalingawan sa barangay, estrikto kini nga mopatuman sa seguridad hinungdan nga makabangga kini sa mga badlungon sa dapit.

“Basin gisuyaan ra ang akong uyoan,” matod sa pag-umangkon. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph