Brgy. Umapad, Mandaue City gideklarar nga ‘drug-cleared’

OPISYAL na nga gideklarar ang Barangay Umapad, Dakbayan sa Mandaue isip usa ka “drug-cleared” human sa malampusong deliberasyon nga gipahigayon sa Regional Oversight Committee on Barangay Drug Clearing (ROCBDC).

Gihimo ang deklarasyon atubangan sa mga representante gikan sa Mandaue City Police Office, Department of the Interior and Local Government (DILG), ug mga opisyal sa barangay.

Si PMAJ Henry S. Orbiso, Acting Chief sa City Community Affairs and Development Unit (CCADU), ug si PLT Danny Boy R. Saunil, Officer-in-Charge sa Police Station 5, maoy nirepresentar ni PCOL Cirilo B. Acosta, Jr., City Director sa Mandaue City Police Office atol sa kalihukan.

Nitambong sab si LGOO VI Rojhelou Patac sa DILG–Mandaue City, ug ang Punong Barangay sa Umapad.

Mga lagda naglakip sa pagkawala sa mga tiggamitan, tigbaligya, ug uban pang drug personalities; ang presensya sa usa ka functional nga Barangay Anti-Drug Abuse Council (Badac); ug ang pagpatuman sa mga programa nga nakabase sa komunidad alang sa pagpugong sa druga, rehabilitasyon, ug reintegrasyon.

Giila sa mga awtoridad ang walay puas nga paningkamot sa barangay sa pagpadayon sa mga lakang batok sa druga ug sa pagtinabangay sa mga ahensiya.

Lima ka barangay sa Mandaue City ang nagpabilin nga drug-affected sama sa Centro, Alang-Alang, Jagobiao, Looc, ug Tipolo. 

Kining mga barangay kasamtangang nagpailawom sa intensive nga mga intervention ug pagpangandam aron kuwalipikado alang sa umaabot nga mga deliberasyon sa ROCBDC ug validation sa drug-clearing.

Ang Mandaue City Police Office uban sa pagtambayayong sa DILG, Philippine Drug Enforcement Agency, ug sa City Anti-Drug Abuse Council, padayon sa ilang suporta alang sa nahabilin nga mga barangay sa clearing pipeline.

Ang mga drug-cleared na nga barangay sa Mandaue naglakip sa Bakilid, Tawason, Subangdaku, Tingub, Paknaan, Casili, Opao, Tabok, Basak, Mantuyong, Canduman, Casuntingan, Cambaro, Ibabao-Estancia, Banilad, Cubacub, Guizo, Labogon, Pagsabungan, Cabancalan, Maguikay, ug Umapad. / CAV