Gisugdan na sa Dumanjug Police Station ang imbestigasyon labot sa nahitabong radio interview sa usa ka 4 anyos nga babaye’ng biktima sa giingong pagpanglugos sa iya ra sab nga uyoan niadtong Marso 8, 2024.
Ang hepe sa Dumanjug Police Station nga si Captain Jan Ace Elcid nagkanayon nga niadtong Dominggo, Marso 10, 2024 lang nila nahibaw-an nga nanawag diay og media ang inahan sa biktima aron magpatambag kon unsay angay nga buhaton.
Pagka sunod adlaw Marso 11, 2024 ang 4 anyos nga batang babaye gidala sa iyang inahan uban sa iyaan ug magtutudlo ngadto sa police station aron mosang-at og pormal nga reklamo labot sa pagpanamastamas sa suspek.
Gipaubos kini sa interview sa personnel sa Women and Children Protection Desk sa police station alang sa paghimo sa affidavit niini.
Gidala kini sa Pink Room sa Vicente Sotto Memorial Medical Center aron mapahiling ang bata dungan sa pasidaan sa mga kabanay ug magtutudlo niini nga dili ipublikar ang nahitabo sa biktima tungod kay confidential.
Apan wala makabantay ang mga sakop sa WCPD nga samtang gipaubos sa interview ang bata, gikuhaan diay og cellphone video sa iyaan ug gipasa niya sa maguwang sa biktima nga mao na usab ang ni-post sa Facebook apan gipapas ra usab pipila ka oras.
Pagka Marso 13, 2024, gi-interview sa usa ka local FM station ang inahan lakip na ang biktima nga niresulta sa lapad nga pagsaway sa publiko ug sa nagkalainlaing pundok sa katilingban.
Ang interview, matod ni Elcid, way pagtugot sa social worker ug Dumanjug Police Station sanglit nidiretso sa panimalay ang usa ka babaye nga reporter.
Human sa interview, gidala sa inahan ang iyang anak sa police station aron ihatag ang resulta sa medical/psychological examination alang na sa pormal nga pagpasaka og kaso batok sa suspek.
Human masayod sa pagpa interview sa ginikanan ug pagtugot sa inahan nga mahinabi sa radio station, gipahimangnoan na dayon nila kini nga hugot nga gidili ang iyang gihimo.
Tungod sa maong mga insidente paglapas sa mga lagda, iduso sa Dumanjug Police Station ang ilang rekomendasyon ngadto sa Camp Crame alang sa posibling pagpasaka og kaso niadtong milapas sa lagda. / AYB