Gidoble ni Bronny James, ang anak ni superstar LeBron, ang iyang pagpangandam para sa umaabot nga National Basketball Association (NBA) season.
Mao kini ang ikaduhang season sa batan-on nga James human sa iyang rookie season sa Los Angeles diin nag-average kini og 2.3 puntos sulod sa 27 games.
Unang gipreparan ni James ang umaabto nga Summer League karong umaabot nga semana.
Giklaro ni James nga seryoso siya sa pagpadayon sa iyang career, labina sa pagka-professional — gikan sa pagkaon og mas himsog nga pagkaon hangtod sa mas hugot nga kondisyon sa lawas.
Sa iyang rookie season, nakaduwa si James og 27 ka mga duwa para sa Lakers, diin usa ra ang iyang pagsugod isip starter, ug nakatampo siya og average nga 2.3 puntos matag duwa. Mas dako siyag minuto nga nadula sa G League diin didto siya nakabuhat og average nga 21.9 puntos matag duwa.
Bisan pa sa kalisod sa pagsugod, mikita og kausaban si James sa iyang shooting performance sa tibuok season. Apan mas giuna niya karon ang pagpalig-on sa iyang kondisyon ug depensa — nga maoy giila nga lig-on niyang bahin sukad pa.
Giila si James nga adunay potensyal sa defensive side sa duwa, ug plano niya nga padayon kining tukuron aron mas mopatigbabaw sa sunod nga season sa NBA.
Pasabot ni James nga nagpagamay pud siya sa timbang karon.
Dugang pa niya nga nagbantay siya sa iyang diet ug nagpadayon sa iyang healthy eating habit.
“It’s just Year 2, so I gotta lock in on the things that I didn’t know before my rookie year and being better and excel with that. Yeah, my main focus is this year, or this summer, has been being in elite condition. That’s what I’ve been talking to my coaches about,” padayag niya. / RSC