Naoperahan na ning bag-uhay lang si Brgy. Ginebra Gin Kings resident import Justin Brownlee sa naangol niyang kumagko sa tuo nga kamot nga iyang nasinati atol sa niaging Philippine Basketball Association (PBA) Season 49 Commissioner’s Cup best-of-seven finals series batok sa TNT Tropang 5G.
“Natapos na yung operation niya. Saglit lang. Outpatient nga lang siya,” matod sa usa ka kasaligang tinubdan nga napatik sa Spin.ph.
Nasinati ni Brownlee ang iyang angol sa Game 3 sa Commissioner’s Cup finals series.
Taliwala niini, padayong niduwa si Brownlee ug nakamaneho pa ang Gin Kings pagposte og 3-2 nga bintaha sa series apan gipilde sila sa Tropang 5G sa nagsunod duha ka mga duwa.
Wala pa matino kon kanus-a makabalik pagduwa si Brownlee apan matod sa tinubdan, gibanabana sa mga doktor nga posible karong Hulyo 8, 2025.
Maayo kini nga kalambuan alang sa Gilas Pilipinas diin sakop si Brownlee isip naturalized player.
Ang sunod nga mayorihiyang torneyo nga salmutan sa Gilas mao ang Fiba Asia Cup, nga ipahigayon karong Agusto 5-17 sa Jeddah, Saudi Arabia.
Nagpasabot nga aduna pa’y igong panahon si Brownlee nga mabalikan sa iyang 100 porsiyento nga kondisyon. / ESL