Sa tanang naturalized players sa 2025 Fiba Asia Cup sa Jeddah, Saudi Arabia, ang pambato sa Gilas Pilipinas nga si Justin Brownlee maoy labing giatangan gumikan sa mga nahimo niini sa nangaging qualifiers.
Apan wala mag-inusara ang resident import sa Brgy. Ginebra Gin Kings niining dungog.
Naa sab si 6’10” Josh Hawkinson, kinsa nagduwa sa Japan gikan pa niadtong 2023.
Si Hawkinson, kinsa produkto sa Washington State, impresibo og gipakita sa iyang pagduwa sa Akatsuki Five sa 2024 Paris Olympics diin nag-average kini og 18.3 puntos ug 9.7 rebounds.
Giatangan sab ang 7-footer sa Chinese Taipei nga si Brandon Gilbeck.
Naa sab si Dar Tucker, kinsa gikuha sa Jordan isip puli ni Rondae Hollis-Jefferson.
Ang nangahisgutan gilaumang makaagak og insakto sa ilang tagsatagsa ka team. / ESL