Sa inisyal nga listahan, nagsagol ang bag-o ug pamilyar nga imports nga mopakita’g aksyon sa season-opening Philippine Basketball Association (PBA) Governor’s Cup nga sugdan karong Agusto 18, 2024.
Mangulo sa tapok mao ang resident import sa Brgy. Ginebra Gin Kings nga si Justine Brownlee, kinsa lab-as pa sa iyang misyon isip naturalized player sa Gilas Pilipinas sa miaging Olympic Qualifying Tournament (OQT) sa Latvia.
Ang Rain or Shine Elasto Painters nakadesisyon nga kuhaon ang laing beteranong import nga si Aaron Fuller aron ikauban pagbalik ni coach Yeng Guiao.
Ang kanhi USC Trojan nakaduwa na ubos sa paggiya ni Guiao sulod sa duha ka mga higayon dihang si Guiao pa ang coach sa NLEX Road Warriors.
Nakaduwa na sab si Fuller sa Blackwater Bossing ug TNT Tropang Giga.
Ang Magnolia Hotshots ug Bossing nakadesisyon nga mokuha og bag-ong imports.
Gipili sa Hotshots mao ang kanhi magduduwa sa National Basketball Association (NBA) nga si Glenn Robinson III samtang gikuha sa Bossing mao si Ricky Ledo, usa sab ka ex-NBA.
Si Robinson, kinsa nidaug isip NBA Slamdunk King niadtong 2017, gikuha sa Minnesota Timberwolves isip 2nd round pick niadtong 2014.
Gikan sa Timberwolves, nabalhin si Robinson sa Philadelphia 76ers, Indiana Pacers, Detroit Pistons, Golden State Warriors dayon sa Sacramento Kings.
Sa iyang bahin, si Ledo gipili sa Milwaukee Bucks niadtong 2013 NBA Draft apan wala kini nakaduwa sa Bucks tungod kay nabalhin dayon kini sa Dallas Mavericks dayon sa New York Knicks.
Wala pa masayri kon kinsa ang imports sa ubang teams. / ESL